Oqimlarga ergashmang!
Barchamizga ma'lum, bugungi kunda internet olamining imkoniyati, ko'lami yana ham kengaydi. Ko'p davlatlarda joriy qilingan karantin sabab, odamlar uyda qolib, ushbu tarmoqdan foydalanish holati bir muncha o'sdi. Bu esa, ayrim buzg'unchi oqimlarning o'zlari ilgari surayotgan da'volarini keng ommaga tarqatish imkoniyati yanada qulay bo'ldi. Ayniqsa, bizning diyorda, telegram messenjeridan foydalanuvchilarning son jihatidan ko'p bo'lishi bularga qo'l keldi. O'zi avvaldan ham telegramdagi bu oqimlarning faoliyati juda ham yuqori edi. Ularning «da'vatlari» bilan yo'g'rilgan kanallarga, afsuski, qanchadan qancha vatandoshlarimiz, Islomni o'rganish maqsadida, ularning niyatini anglamasdan a'zo bo'lib, natijada e'tiqodga tegishli masalalarda ikkilanish holatlari ko'zga tashlanib qoldi va. Ayniqsa, kundalik namozlardan keyin o'qiladigan zikrlar to'g'risidagi noo'rin gaplar, iymon va amal haqidagi mulohazalar, juma tabrigi mavzusi va hokazo holatlarda odamlar o'rtasida qarama-qarshi fikrlar o'yg'onishiga sabab bo'ldi. Karantin davrida esa, ushbu «da'vatchilar» yana ham faollashib, hanafiy mazhabini niqob qilib olib, go'yoki Imomi A'zam rohmatullohi alayhga o'zini ergashgan qilib ko'rsatib, aslida esa bemazhablikni tarqatishga qaratilgan g'oyalarni singdirishga bo'lgan harakatlar avvalgidan ham avj oldi.
Halqimizda Islomni o'rganishga bo'lgan intilish yuqori bo'lgani uchun, bu masalada kerakli ma'lumotlar bilan qondirish maqsadida, hozirda, alhamdulillah, O'zbekiston musulmonlari idorasi tizimida faoliyat yuritib turgan ahli ilmlarimiz tomonidan, yutub, telegram, feysbuk va boshqa axborot vositalari orqali etarli ma'lumotlar berib borish yo'lga qo'yildi. Vatandoshlarimizni dinimizga tegishli bo'lgan masalalarda yordam berish maqsadida alohida savol-javoblarga qaratilgan telegram kanallari, koll-tsentrlar tashkil qilindi. Albatta, bunga undagan narsa, xalqimizning aqidaviy, fiqhiy masalalardagi kerakli, asosli bilimlar bilan ta'minlash, ularning aqidasini sofligini saqlab qolish ko'zda tutilgan. Ushbulardan kelib chiqib, aytmoqchi bo'lganimiz, avvalo ogohlik ma'nosida, qolaversa, Alloh taoloning mo'min mo'minning birodari, degan Kalomiga muvofiq, dindoshlik yuzasidan mana shunday oqimlarga xayrihoh bo'lib qolib, o'zlariga jabr qilib qo'yishlaridan ehtiyot bo'lishlariga chaqirgan bo'lar edik. Zero, hazrati Rasuli akram sollallohu alayhi vasallam: “Mo'minlar bir-birlariga mehr-muhabbat va g'amxo'rlik qilishda bamisoli bitta tana kabidirlar. Agar tanada bir a'zo og'risa, qolgan a'zolar isitma va bedorlik bilan unga sherik bo'ladi” (Muttafaqun alayh), deya bejiz aytmaganlar. Bu esa, bir vatandoshimizning jabr tortishi bizga ham ozor berishidan darak beradi.
Qodirjon Umurzakov,
Pop tumani «Muhammadjon qori»jome
masjidining imom-xatibi
Registon maydonini Imom al-Moturidiy maqbarasi bilan bog‘laydigan ko‘cha rekonstruksiya qilinmoqda
Samarqandning tarixiy qismida turizm infratuzilmasini keng ko‘lamli yangilash ishlari davom etmoqda. Amalga oshirilayotgan loyihalarning asosiy maqsadi xorijiy sayyohlarning qolish muddatini uzaytirish, qulay shahar muhitini yaratish va bir vaqtning o‘zida mahalliy aholining hayot sifatini oshirishdan iborat.
“Samarkandskiy vestnik” nashriga ko‘ra, turizmni rivojlantirish dasturi doirasida eski shaharning 13 ta ko‘chasi bosqichma-bosqich zamonaviy piyodalar yo‘lagiga aylantirilmoqda. Bu yerda yangi xizmat ko‘rsatish obyektlari barpo etilmoqda, jamoat joylari obodonlashtirilmoqda, milliy me’morchilik an’analarini saqlab qolgan holda muhandislik kommunikatsiyalari va bino fasadlari yangilanmoqda.
Eng yirik loyihalardan biri Registon maydonini Imom al-Moturidiy maqbarasi bilan bog‘laydigan Buxoro ko‘chasini rekonstruksiya qilish bo‘ldi. Ko‘chaning 850 metr qismi to‘liq piyodalar hududiga aylantiriladi. Loyihani ishlab chiquvchilardan biri, Samarqand davlat texnika universiteti o‘qituvchisi Jasur Berdiqulovning ta’kidlashicha, ilgari bu yerda qatnov qismining torligi tufayli muntazam ravishda tirbandliklar yuzaga kelgan, qulay piyodalar yo‘laklarining yo‘qligi esa piyodalar uchun jiddiy noqulayliklar tug‘dirgan. Ishlar yakunlangach, ko‘cha xavfsiz jamoat maydoniga aylanadi. Aholi uchun alohida to‘xtash joyi ajratilgan bo‘lib, transport vositalarining kirishiga faqat zarurat tug‘ilganda maxsus xizmatlarga ruxsat beriladi. Shu bilan birga, suv, gaz, elektr va boshqa muhandislik tarmoqlari to‘liq modernizatsiya qilinmoqda.
Oltin asr mahallasida joylashgan Bag‘dod ko‘chasida ham ishlar davom etmoqda. Bu yerda 600 metrlik hudud obodonlashtirilmoqda. Loyiha doirasida zamonaviy turizm va xizmat ko‘rsatish infratuzilmasini yaratish, kichik biznes va xizmat ko‘rsatish sohasini rivojlantirish ko‘zda tutilgan.
O‘zbekiston musulmonlari idorasi Matbuot xizmati
