Yoshi to'qsondan oshgan onaxonning o'g'li aytadi: “Bir kuni uyimizga qarindoshimiz kelib qoldi. Yonimda onam o'tirgan edilar, ularni ko'rishlari bilan: “MashaAlloh, uyingizda onangiz, sizning huzuringizda?” dedi”.

Men: “Yo'g'-e. Men u kishining huzurlarida, uylaridaman”, dedim.

Shunda onam: “Yo'q, ey o'g'lim. Bolaligingda sen bizni huzurimizda eding. Keksayganimizdan keyin, biz sening huzuringda bo'lamiz. Alloh taoloning ushbu kalomini o'qimaganmisan? “Agar ularning biri yoki har ikkisi huzuringda keksalik yoshiga etsalar”(Isro surasi, 23-oyat), dedilar”.

O'g'il aytadi: “Go'yoki men ushbu oyatni endigina eshitayotgan bo'ldim. Ota-onalardagi hamma narsa yoshlari o'tgan sayin zaiflashib borar ekan, faqat otalik va onalik mehri kuchayib boraveradi”.

Shunday ekan ushbu mehrni sovuqqonlik bilan so'ndirib qo'yishdan saqlaning. Ota-onangizni ularga itoatsizlik qilib hafa qilib qo'ymang. Allohga qasamki, ota-onaning farzandidan hasrat qilib to'kkan bir tomchi ko'z yoshi farzandning hayotini zulmat girdobiga g'arq qilishga kifoya qiladi.

Ushbu duoni ko'p takrorlang: “Robbim, meni va ota-onamni mag'firat qilgin”, “Robbim, menga rahm qilganlaridek, Sen ham ota-onamga rahm qil”.

Zero, ushbu duoning o'zi ham ota-onaga yaxshilik qilishning bir ko'rinishidir.

 Homidjon qori IShMATBYeKOV