Nega qo‘limizda turgan cheksiz boylikni tashlab o‘tkinchi boylik sari oshiqamiz?
Abu Hanifa rahimahulloh o‘tkir zehn – zakovat, fahm – farosat, yuksak fazilat egasi bo‘lganlar. U zotning o‘ta aniq va teran fikrlaridan ko‘plab odamlar xabardor edi. Kunlardan birida kechga yaqin bir kishi Abu Hanifa rahimahullohning huzurlariga kelib o‘zining shikoyatini arz qildi:
- Men pullarimni qayerga berkitib qo‘ganimni unutib qo‘ydim. Iltimos, menga pullarimni topishimda yordam bering, - dedi.
- Shunda Abu Hanifa rahimahulloh:
- Yaxshi, aslida bu ish bilan shug‘ullanish mening vazifam bo‘lmasa-da urunib ko‘raman, - deb javob berdilar.
- So‘ngra, uzoq o‘ylab Abu Hanifa bunday dedilar:
- Uyingizga borib Allohning ibodati bilan tonggacha mashg‘ul bo‘ling, ajab emas shunda Allohning inoyati ila pullaringizni qayerga qo‘yganingiz yodingizga tushsa.
- Haligi kishi Abu Hanifa aytganlaridek uyga borib endigina namoz o‘qishni boshlayotganida birdan pulini qayerga qo‘ygani yodiga tushdi. Tezda namozini o‘qib, pulini olish uchun shoshilib chiqib ketdi. Ertasi kuni yana Abu Hanifa rahimahullohning huzurlariga o‘zining quvonchi va tashakkurini izhor qilish uchun tashrif buyurdi. Abu Hanifadan qanday qilib namoz o‘qishni boshlaganda pulini berkitgan joy yodiga tushishligini bilganligi haqida qiziqib so‘radi. Shunda Abu Hanifa:
- Shayton seni to tonggacha namozda qoim turishda ko‘rishni istamaydi, shu sababli, namozni tezda tugatishing uchun senga pulingni turgan joyini eslatdi, sen esa namozni tark etib pul tomon shoshib ketding, deb javob berdilar.
Davron NURMUHAMMAD
Indoneziya haj va umra asossiatsiyalari delegatsiyasi yurtimizda
Bugun, 25 iyun kuni Indoneziya haj va umra asossiatsiyalarining doktor Muslim Iskandar boshchiligidagi vakillari O‘zbekiston musulmonlari idorasida bo‘lishdi. Mehmonlar bilan diniy idora raisining birinchi o‘rinbosari Homidjon domla Ishmatbekov uchrashuv o‘tkazdi.
Sakkiz nafar delegatsiya a’zolari: Doktor Muslim Iskandar, Asip Bisma Supriatna, Zaid Muslim Iskandar, Mustain Xattob, Muhammad Atsir Abdulaziz, Jannatul Ma’vo, Muhammad Iqbol hamda Hilman Parifiy birma-bir o‘zlarini tanishtirib, “Umra +” loyihasini o‘rganish maqsadida 3400 ta turfirma nomidan vakil bo‘lib kelishganini bildirishdi.
Uchrashuv avvalida Homidjon domla mehmonlarni tashrif bilan qutlab, kelganlari uchun minnatdorlik bildirdi. So‘nggi yillarda yurtimizda diniy-ma’rifiy, turizm va boshqa sohalarda bo‘layotgan yangilanishlar haqida aytib o‘tdi. Xususan, 2017 yilda tamal toshi qo‘yilgan Islom sivilaziyasi markazi, qayta bunyod etilayotgan Imom Buxoriy majmuasi, Hazrati Imom dahasida olib borilayotgan bunyodkorlik ishlariga to‘xtaldi.
O‘z navbatida delegatsiya rahbari Muslim Iskandar ularga bu taklifni bildirgan “Real Dreams” sayyohlik firmasidan minnatdor ekanliklarini aytib, O‘zbekiston haqida juda ham ijobiy taassurotlarda ekanini ta’kidladi. Birgina Toshkent shahridagi o‘rganishlari natijasida O‘zbekistonda ziyorat turizmi sohasi istiqbolli ekani, hali Samarqand, Buxoro, Xiva kabi qadim va navqiron shaharlarni ham borib ko‘rishlarini, lekin hozirdanoq “Umra +” loyihasi juda istiqbolli ekaniga amin bo‘lganini bayon etdi.
Delegatsiya a’zosi, “Kasturi” birlashmasi rahbari Muhammad Atir 2017 yilda ham O‘zbekistonga kelganini, o‘sha payt bilan oradan o‘tgan qisqa vaqtdagi ulkan o‘zgarishlardan hayratda ekanini aytib, bu ishlar yurtning allamolariga, ilmiy-ma’rifiy merosga bo‘lgan e’tiboridan darak ekaniga urg‘u berib o‘tdi.
Shuningdek, delegatsiyaning boshqa a’zolari – Indoneziyaning “Amphuri”, “Hagatama”, “NRA Group Ltd.” “Jannatul Ma’wah”, “Himpuh” kabi minglab turfirmalarni birlashtirgan asossiatsiyalari rahbarlari ham musulmon sayyohlar e’tibori va oqimini O‘zbekistonga bemalol yo‘naltirish mumkinligini, bu xayrli ish ikki davlat uchun ham har tomonlama manfaat keltirishini ta’kidlashdi.
O‘zbekiston musulmonlari idorasi
Matbuot xizmati
