Uyali aloqa masofalarni yaqinlashtirib, yaqin insonlarning bir-biriga g‘oyibona diydorlashuviga bir vositadir. Uyali aloqadan foydalanganda, ayniqsa, jamoat joylarda ehtiyot bo‘lib gaplashish zarur. Telefonda aytayotgan so‘zimizning salmog‘ini taroziga solib ko‘rib gapirganimizda shu narsa aniqki, suhbat uzoqqa cho‘zilmaydi.

Bir kuni yoshgina ayolning telefonda dugonasi bilan so‘zlashayotgani qulog‘imga chalindi. Uzoq suhbatining orasidagi bir jumla e’tiborimni tortdi. “Kecha Nodira bilan erini uchratib qoldim, eri biram shirin ekanki, ko‘zlari qop-qora, juda-juda shirin” deya ko‘p bora ta’kidladi. Go‘yo yomon so‘zni eshitganday unga qarab qo‘ydim. U esa beparvolik bilan gapida yana davom etaverdi...

Nomahram erkak haqida shu qadar to‘lqinlanib gapirish ayol  kishiga harom emasmi?..

Ilgarilari kinoaktyorlar va mashhur qo‘shiqchilar haqida shunday ta’rifu tavsif qilgan qiz-juvon behayo ko‘rinardi. Bugungi ayollar esa bir-birining turmush o‘rtoqlari haqida shunday nosha’riy o‘y-xayollarga bormoqda. Alloh taolo Qur’oni karimda ayollarni bunday ogohlantirgan: “...Bas, sizlar (nomahram erkaklarga) mayin so‘z qilmangiz, aks holda qalbida buzuqlik bo‘lgan kimsa (sizdan) tama qilib qolur. Yaxshi (to‘g‘ri) so‘zni so‘zlangiz!” (Ahzob surasi 32-oyat).

Muslima HUSNIDDIN qizi