O`zbekiston musulmonlari idorasi

Mualliflar kitoblarni nega qo‘rqinchli nomlamoqda?

04.05.2018 3276 2 min.

Bugun kitob do‘konlarida qora va rangdor tusdagi, nomi esa tashqi ko‘rinishidan ham qo‘rqinchli kitoblar to‘lib ketdi.

Farzand dunyoga kelar ekan, ota-ona unga barkamol unib-o‘ssin, nomiga monand atrofdagilariga yaxshiliklar ulashsin, deya nafis ismlar qo‘yishadi. Ijodkorning ham bir asar yaratishini xuddi ota-onaga mezgash mumkin. Bilaks, bugun kitob do‘konlarida qora va rangdor tusdagi, nomi esa tashqi ko‘rinishidan ham qo‘rqinchli kitoblar to‘lib ketdi. Shu o‘rinda bir savol tug‘iladi. Nega ijodkorlar o‘z “farzand”larini qo‘rqinchli nomlamoqda?

Masalan, Nuriddin Ismoilovning “Iblis saltanati”, “Mafiya sardori”, Nabijon Hoshimovning “Yovvoyi qiz”, Ilhom Zoirning “Ajal piramidasi”, Bahodir Xudoberganovning “Qo‘ynimdagi qotil”, Azamat Qorjovovning “Marhum kelinning xiyonati”, “Zindonband qiz nolasi”, “Qil ustidagi taqdir”, “Go‘r qizi” nomli ko‘plab asarlarga duch kelamiz.

Kitob mutolaasiga keng e’tibor berilayotgan sharoitda ular soni, turi va xillari ham ko‘payib ketdi. Mana yigirma-o‘ttiz yildirki, kitobxonlar orasida detektiv asarlarni o‘qish avj olgan. Aslida, kitobning yomoni bo‘lmaydi. Ammo ruhiyatga, qalbga salbiy ta’sir etadiganlari uchraydi.

Asar yaxshi bo‘lsa, hech qanday yaltiroq va jimjimador nomsiz ham o‘z o‘quvchisini topadi. Bugungi kunda detektiv asarlar shiddat bilan o‘quvchilar orasida ommalashyapti. Aslida, o‘quvchini majburlab bo‘lsa ham kitob o‘qitish savob ish. Ammo bu xildagi asarlar qay darajada kitobxon salohiyati o‘sishida ahamiyat kasb etayapti? Badiiy adabiyot bo‘stoniga qanchalar foydasi tegmoqda? Balki, faqat nomigina ularning ko‘p o‘qilish reytingini saqlab turgandir. Qaydam, asrlar o‘tib ham so‘zning sehri tufayli o‘quvchilar qalbiga yo‘l topib boradimi, yo‘qmi buni vaqt ko‘rsatadi. Ammo kitobni bu darajada qo‘rqinchli va qo‘pol nomlamaslik kerak nazarimda.

To‘g‘ri, milliy dostonchiligimizda “Go‘ro‘g‘li”, yigirmanchi asr adabiyotimizda esa “Dahshat” va “Jinlar bazmi” nomli mashhur asarlar bor. Vaqtlar o‘tib ham ushbular badiiy did va saviyasi balandligi tufayli adabiyotimizda saqlanib, o‘z o‘quvchisini yo‘qotmadi. Ammo bugun mo‘may pul ishlab olish maqsadida chiqarilayotgan ayrim kitoblarni ertaga kitobxon o‘qimasligi ham mumkin.

Unutmaylik, asrlar o‘tsa ham kitob insonni ma’rifatga yetaklaydigan yagona yo‘l bo‘lib qoladi.

Dilobar Asliddin qizi,

O‘zMU magistranti.

Manba: http://www.uza.uz

O'zbekiston yangiliklari

04 Avgust, 2025, 10 Safar, 1447

Avvalgi sayt

Mualliflar kitoblarni nega qo‘rqinchli nomlamoqda?

MА`LUMOTNI IJTIMOIY TАRMOQLАRDА ULАSHING

Mashinada qoldirilgan buyumlarning hukmi

MА`LUMOTNI IJTIMOIY TАRMOQLАRDА ULАSHING