"Bizda do‘zax haqida ilmul yaqiyn bor. Bu do‘zax haqidagi ilm bo‘lib, Qur’ondagi do‘zax haqida kelgan ma’lumotlardir. Bu Robbimizning bizga do‘zax haqida bildirgan ilmidir. “Albatta, do‘zaxning sifatlari mana bunday, mana bunday” deb, bizni do‘zaxdan ogohlantirgan. Biz shu dunyoning farovon hayotida yashab turganimizda, Alloh bizga do‘zaxni tanitib, undan ehtiyot bo‘lishga chaqirgan va ehtiyot bo‘lish yo‘llarini ko‘rsatgan.

Aynul yaqiyn esa, oxiratda, Sirot ustidan o‘tayotganimizda, ostimizdagi do‘zaxni ko‘rganda bo‘ladi. O‘shanda do‘zaxni ko‘zimiz bilan ko‘ramiz. Haqqul yaqiyn esa, faqat kofirlarga bo‘ladi. O‘sha Kunda kofirlar do‘zaxga tashlanadilar va azobni boshlaridan kechiradilar. Mana shu haqqul yaqiyndir.

Buning uchun bir misol keltiramiz: agar men sizga “Nyu York degan shahar bor. U yerda osmono‘par binolar bor. U shaharning sifati falon, falon” desam, sizga rost ilmiy suratini bayon qilgan bo‘laman. Agar siz ushbu gaplarimni tasdiqlasangiz, sizda o‘sha shahar haqida ilmul yaqiyn hosil bo‘ladi. Agar biz o‘sha shaharning ustidan samolyotda uchib o‘tsak va uni o‘z ko‘zimiz bilan ko‘rsak, bu ko‘rish aynul yaqiyn bo‘ladi. Agar siz o‘sha shaharga tushib, u yerda yashab, ko‘chalarini aylanib yursangiz, bu haqqul yaqiyn bo‘ladi".

Shayx Muhammad Mutavalliy Sha’roviy rahimahullohning tafsirlaridan Nozimjon Iminjonov tarjimasi