Quvaytning Tijorat va sanoat vazirligi muqaddas Ramazon oyida savdo rastalaridagi oziq-ovqat mahsulotlarining narxlari muntazam kuzatuv ostida bo‘lishini ma’lum qilgan.

Vazirlik kecha, 11 aprel kuni tarqatgan bayonotiga ko‘ra, Iste’molchilar huquqlarini himoya qilish jamiyati Ramazon oyida kooperativ jamiyatlari va bozorlarda turli oziq-ovqat mahsulotlari narxlarini kuzatib borish masalasida yig‘ilish o‘tkazdi.

"KUNA" axborot agentligi xabariga ko‘ra, idishi shikastlangan yoki muddati o‘tgan mahsulotlar sotuvga chiqarilishining oldini olish maqsadida vazirlik huzurida mamlakat bo‘ylab nazorat olib boradigan maxsus guruhlar tuzishga ko‘rsatma berilgan. Qonunni buzgan do‘konlarga jarima solish yoki ularni yopib qo‘yishga buyruq berilgan.

Maxsus guruhlar zimmasiga ro‘za boshlangunicha hamma do‘konlarda kerakli oziq-ovqat mahsulotlari bo‘lishini va savdoga chiqarilishini ta’minlash vazifasi yuklatilgan.

Ayni paytda vazirlik iste’molchilarning har qanday shikoyatlarini qabul qilish uchun maxsus telefon liniyasi ochilishini bildirgan.

O‘MI Matbuot xizmati