Tailanddagi xalqaro ko'rgazmada halol mahsulotlar namoyish etiladi
Tailand xalqaro oziq-ovqat ko'rgazmasi ishtirokchilari "Halol" yorlig'i bilan oziq-ovqat ishlab chiqaruvchi kompaniyalarning katta namoyishiga guvoh bo'ladi. Mazkur ko'rgazma shu yil 23 maydan 27 maygacha bo'lib o'tadi. Ko'rgazma Tailanddagi eksportchi va ishlab chiqaruvchilar o'rtasidagi aloqalarni mustahkamlash maqsadida 11 ta alohida pavilonda ish olib boradi.
“Halol markalari” pavilonida ishlab chiqaruvchilar “Halol” belgisiga ega oziq-ovqat va ichimliklar turlarini, boshqa pavilonda esa halol ishlab chiqarish sohasidagi eng yangi texnologiyalar namoyish etiladi.
E'tiborlisi, Tailand islomiy bo'lmagan davlat bo'lsa-da, halol mahsulotlar eksport qiluvchi davlatlar orasida o'n ikkinchi, halol oziq-ovqat ishlab chiqarish bo'yicha beshinchi o'rinni egallaydi.
Ma'lumot o'rnida halol oziq-ovqat ishlab chiqarish Tailand umumiy oziq-ovqat eksportining 20 foizini tashkil qiladi. Mamlakat halol oziq-ovqatlarining 60 foizi Indoneziya, Malayziya va Bruneyga eksport qilinadi.
Tailandda “halol” sertifikatni “Tailand Markaziy Islom Kengashi (CICOT)" deb nomlangan maxsus islom jamiyati beradi. U o'z navbatida hukumatning bevosita nazorati ostida ish yuritadi.
O'zbekiston musulmonlari idorasi
Matbuot xizmati
Malayziya telekanalida O‘zbekistonning ziyorat turizmi imkoniyatlari keng yoritildi
Malayziyaning “Berita RTM” telekanalida O‘zbekistonda ziyorat turizmi sohasida amalga oshirilayotgan islohotlarga bag‘ishlangan maxsus dastur namoyish etildi, deb xabar bermoqda “Dunyo” AA.
Mamlakatimiz mustaqilligining 35 yilligi arafasida efirga uzatilgan ushbu ko‘rsatuvda malayziyalik professorlar – Badrul Isa va Norfadilah Kamaruddin tomonidan ishlab chiqilgan “O‘zbekiston–Malayziya: kreativ turizm” nomli loyiha taqdim etildi.
Olimlar tashabbusi bilan yaratilgan mazkur loyiha mamlakatimizning Malayziyadagi elchixonasi, Turizm qo‘mitasi va Islom sivilizatsiyasi markazi hamkorligida amalga oshirildi.
Tashabbus O‘zbekistonning turizm imkoniyatlari haqida “Visual storytelling” formatida professional raqamli kontent yaratishni nazarda tutadi.
Loyihaga ko‘ra, 17–31 avgust kunlari Malayziya UiTM texnologiya universitetining professional fotograflari va dizaynerlaridan iborat ijodiy jamoa Toshkent, Samarqand, Buxoro va Xorazmda suratga olish ishlarini olib boradi.
Malayziyalik ijodkorlar yurtimiz haqida tayyorlagan foto va videomateriallar “Instagram”, “Facebook”, “TikTok”, “YouTube” kabi internet platformalarda joylashtirilishi rejalashtirilgan. Loyihada yurtimiz oliy o‘quv yurtlarining dizayn, san’at, turizm va mehmonxona biznesi yo‘nalishidagi talabalari ham ishtirok etadi. Bu akademik, turizm va ijodiy sohalarda tajriba almashishni tashkil etish imkonini beradi.
Dasturda fikr bildirgan Badrul Isa loyiha ASЕAN mamlakatlari va musulmon olamida O‘zbekistonni yanada kengroq tanitishga xizmat qilishini ta’kidladi. Uning fikricha, raqamli platformalar orqali mamlakatimiz tarixiy merosi, ziyorat turizmi va amalga oshirilayotgan so‘nggi o‘zgarishlari keng yoritiladi.
“Biz boy tarixiy meros, yuksak madaniyat va mehmondo‘st xalqqa ega bo‘lgan O‘zbekistonni ASЕAN mintaqasi aholisi tomonidan qayta kashf etilishini istaymiz”, – dedi professor.
Shuningdek, u O‘zbekiston xalqini mustaqillikning 35 yilligi bilan tabriklab, loyiha natijalari ushbu sanaga munosib sovg‘a bo‘lishini qayd etdi.
Ushbu tashabbus O‘zbekistonning ziyorat turizmini ommalashtirish va ASЕAN mamlakatlaridan ko‘proq sayyohlarni jalb qilishga xizmat qilishi kutilmoqda.
O‘zbekiston musulmonlari idorasi Matbuot xizmati
