Alloh taolo bunday marhamat qiladi: “Hotinlarga mahrlarini mamnunlik bilan beringiz! Agar sizlarga o'zlari undan biror narsani ixtiyoriy ravishda kechsa (bersa)lar, sizlar uni bemalol, ishtaha bilan tanovul qilaveringiz”(Niso surasi, 4-oyat).
Agar xotin bemor eriga o'z molidan edirsa, Allohning izni bilan shifo topadi.
Imom Suyutiy rahimahulloh “Durrul mansur” nomli tafsirida va Ibn Kasir rahimahulloh o'z tafsirida ayollarning mahri borasidagi yuqoridagi oyatni sharhlar ekanlar quyidagi rivoyatni keltiradilar: “Ali ibn Abu Tolib roziyallohu anhudan rivoyat qilinadi, u kishi aytadilar: “Qachon birortangiz kasal bo'lsangiz ayolidan uch dirham berishini so'rasin. So'ngra, shu pulga asal sotib olib, unga yomg'ir suvini aralashtirsin va ichsin. Shunda ishtaha, shifo va baraka jam bo'ladi”.
Hazrati Ali roziyallohu anhu “ishtaha” deganda yuqoridagi oyatni, shifo va baraka deganda quyidagi oyatlarni ta'vil qilganlar: “Ularning qorinlaridan odamlar uchun shifo bo'lgan turli rangdagi sharbat (asal) chiqur”(Nahl surasi, 69-oyat).
“Biz osmondan barakotli suv (yomg'ir) yog'dirdik”(Qof surasi, 9-oyat).
Katta tobein Alqama rahimahulloh ayoliga: “Menga bemalol, ishtaha bilan tanovul qilinadigan molingdan edir”, der edilar.
Tafsiri Ulusiyda keladi: “Bir kishi Ali raziyallohu anhuning huzurlariga kelib: “Qornimda og'riq bo'lyapti”, deb shikoyat qildi. Ali roziyallohu anhu: “Ayoling bormi?”deb so'radilar. U: “Ha”, dedi. “Unday bo'lsa, borib ayolingdan molidan chin ko'ngildan biror narsa berishini so'ra. So'ngra o'sha pulga asal sotib ol va unga yomg'ir suvidan qo'shib ich. Chunki Alloh taolo ayolning moli haqida: “Agar sizlarga o'zlari undan biror narsani ixtiyoriy ravishda kechsa (bersa)lar, sizlar uni bemalol, ishtaha bilan tanovul qilaveringiz”, degan.
Asal haqida: “Ularning qorinlaridan odamlar uchun shifo bo'lgan turli rangdagi sharbat (asal) chiqur”, degan.
Yomg'ir haqida esa, “Biz osmondan barakotli suv (yomg'ir) yog'dirdik”, degan.
Qachon baraka, shifo va ishtaha birlashsa, inshaalloh shifo topasan, dedilar”. Shundan keyin kishi uyiga borib aytilgandek qildi va sog'ayib ketdi.
Homidjon qori IShMATBYeKOV
Iymon 
Namoz 
Ro'za 
Zakot 
Haj 
Qur'on 
Islom saboqlari 
Aloqa 
