Britaniya poytaxti Londondagi “Christie's” kimoshdi savdo uyida joriy yilning 26 aprel kuni sotuvga qo‘yiladigan ashyolar ro‘yxati e’lon qilindi. Bu haqda “christies.com” saytida xabar berildi.

Eng noyob lot hisoblanayotgan o‘nta ashyo ro‘yxatida birinchi bo‘lib Qur’oni Karimning qadimiy mus'hafi turibdi.

Mus'haf Usmonli imperiyasi davridagi turk xattoti Yahyo Hilmi tomonidan ko‘chirilgan bo‘lib, yaratilgan vaqti 1886–1877 yillar ekani ma’lum qilingan. Mus'haf illyuminatsiyasiga Usmon Yumni imzosi chekilgan.

Qur’oni Karim qo‘lyozma nusxasining boshlang‘ich narxi 492 449 AQSH dollaridan 703 499 AQSH dollarigacha deb baholangan.

Kimoshdi savdosida Islom va hind dunyosi san’atiga tegishli qo‘lda to‘qilgan qadimiy sholcha va gilamlarni o‘z ichiga olgan san’at namunalari savdoga qo‘yilishi ma’lum qilingan.

Bundan tashqari, savdoga ikki dona Qur’on oyati yozilgan pushti rangdagi sahifalar qo‘yilgani va ularning 13 asrda Ispaniyada yaratilgani aytib o‘tilgan. Ularning har biriga 11-16 ming AQSH dollari miqdorida boshlang‘ich narx belgilangani qayd etilgan.

O‘MI Matbuot xizmati