O‘zbekiston Milliy kutubxonasida “Samarqand allomalari”, “Samarqand yodgorliklari” va “ISHIDning botil g‘oyalari va ularga raddiyalar” kitoblarining taqdimoti bo‘lib o‘tdi.

O‘zbekiston Respublikasi Vazirlar Mahkamasi huzuridagi Imom Buxoriy xalqaro ilmiy-tadqiqot markazi nashriyoti tomonidan chop etilgan mazkur kitoblar markaz tashkil topgan kundan boshlab, bir yil mobaynida bajarilgan ilmiy-tadqiqot faoliyatining o‘ziga xos hisoboti bo‘ldi.

Imom Buxoriy xalqaro ilmiy-tadqiqot markazi matbuot xizmati bildirishicha, taqdimotda akademik-olimlar, professor-o‘qituvchilar, mutaxassislar, tadqiqotchilar, talabalar, keng jamoatchilik va ommaviy axborot vositalari vakillari ishtirok etdi.

Tadbirda bugungi globallashuv jarayonida yurtimizda islom dinining asl mazmun-mohiyatini, buyuk allomalarimizning ilmiy va ma’naviy merosini, pandu-o‘gitlarini o‘rganish, tadqiq va targ‘ib qilish muhim ahamiyatga ega ekani alohida ta’kidlandi.

Mazkur kitoblar umumta’lim, o‘rta maxsus ta’lim o‘quvchilari, oliy ta’lim muassasalari talabalarining tarixiy bilimlarga asoslangan huquqiy, diniy bilimini boyitishga ko‘maklashish bilan birga, ilmiy tadqiqotchilar, tarixchi va manbashunoslar uchun manbaviy asos bo‘lib xizmat qiladi.

“Samarqand allomalari” va “Samarqand yodgorliklari” kitoblarida Samarqand viloyatining boy tarixi, ulug‘ allomalari, madaniy obyektlari, ziyoratgohlar, madaniy merosga oid inshootlar tarixiy hamda zamonaviy suratlar bilan bezatilib, ular haqida batafsil ma’lumot berilgan. Kitobning tayyorlanish jarayonida Samarqanddan yetishib chiqqan allomalar tarixi va ular tomonidan qoldirilgan ilmiy-ma’naviy meros keng o‘rganilib, muhim ma’lumotlar keltirilgan. Tadqiqot natijasida hali keng ilmiy jamoatchilikka ma’lum bo‘lmagan bir qancha buyuk shaxslar, alloma va mutafakkirlar tarixi ham o‘rganilib, ilmiy muomalaga kiritilgan.

“ISHIDning botil g‘oyalari va ularga raddiyalar” kitobida bugungi kunda o‘zlarining botil g‘oyalarini ilgari surib, “takfir", "jihod", "hijrat", "bay’at", "tog‘ut", "xalifalik” singari chaqiriqlar bilan dunyo afkor ommasini tashvishga solayotgan barcha yot diniy oqimlarga nisbatan “jaholatga qarshi ma’rifat” uslubida raddiyalar berilgan. Kitob diniy mutaxassislar, profilaktika ishlari bilan shug‘ullanuvchi soha xizmatchilari, diniy-ma’rifiy ishlar bo‘yicha maslahatchilar hamda ma’rifiy ishlar bilan mashg‘ul bo‘lgan yurtdoshlarimizga mo‘ljallangan.

Tadbir ishtirokchilari o‘zlarini qiziqtirgan savollarga batafsil javob oldi.

O‘zbekiston musulmonlari idorasi matbuot xizmati