Hayotimiz o‘zgaruvchan ekanligi, yutuq va mag‘lubiyatlardan, qiyinchilik va yengilliklardan iboratligi hammamizga ma’lum. Ular xuddi kun tunga, tun kunga almashgani kabi o‘zgarib turadi. Kecha quvonchdan boshimiz osmonga yetayozgan bo‘lishi mumkin, lekin bugun esa qayg‘udan ko‘zlarimiz oldi qorong‘ulikka burkanishi ehtimoldan holi emas. Hayotning ushbu charxpalagida qanday qilib oyoqda qola olamiz? Qanday qilib sinovli dunyoning girdobiga g‘arq bo‘lmaslik mumkin?
Sinovlarga dosh berish mushkul, inson tabiatiga ko‘ra zaif, shu sababli ham qiyinchiliklarni yengish unga imkonsizday tuyulaveradi. Har kim o‘zi uchun turlicha tirgak qidiradi, Yaratganni taniganlar esa Unga tayanadi, o‘ziga yuborilgan sinovlarni sabr bilan qabul qiladi. Imon egasi bu dunyoda hech narsa Allohning iznisiz sodir bo‘lmasligini biladi, shuning uchun barcha taqdir beqarorliklarini bosiqlik bilan qabul qiladi. Alloh taoloning marhamati har qanday musibatu qayg‘udan ustun ekanligini anglagan banda Yaratgandan taskin izlaydi va Ungagina umid qiladi. Alloh taolo har birimizga murojaat qilgan Muqaddas Qur’on oyatlarini o‘qir ekan inson xotirjamlikka erishadi va unda kelajakka ishonch paydo bo‘ladi.
Qur’oni Karim, so‘zsiz, insonlarga ko‘rsatma, nur, eslatma, saodat kaliti etib yuborilgan. Quyidagi oyatlar kishi hayotining mushkul pallalarida yordam beradi va sinovlarni sabot bilan yengishiga, chiroyli sabr qilishiga ko‘maklashadi:
1-oyat:
إِنَّ مَعَ الْعُسْرِ يُسْرًا
Ya’ni, “Albatta, har bir qiyinchilik bilan birga yengillik bordir” (Sharh surasi 6-oyat).
2-oyat:
قَالَ لَا تَخَافَا إِنَّنِي مَعَكُمَا أَسْمَعُ وَأَرَى
Ya’ni, “(Alloh) aytdi: «Qo‘rqmangiz! Albatta, Men sizlar bilan birgaman – eshitaman va ko‘raman” (Toho surasi 46-oyat).
3-oyat:
اللَّهُ وَلِيُّ الَّذِينَ آَمَنُوا يُخْرِجُهُمْ مِنَ الظُّلُمَاتِ إِلَى النُّورِ وَالَّذِينَ كَفَرُوا أَوْلِيَاؤُهُمُ الطَّاغُوتُ يُخْرِجُونَهُمْ مِنَ النُّورِ إِلَى الظُّلُمَاتِ أُولَئِكَ أَصْحَابُ النَّارِ هُمْ فِيهَا خَالِدُونَ
Ya’ni, “Alloh imon keltirganlarning do‘stidir. Ularni zulmatdan nur sari chiqaradi. Kofirlarning do‘stlari esa shaytonlar (butlar)dir. Ularni (kofirlarni) nurdan zulmat sari chiqaradilar. Ana o‘shalar do‘zax ahlidirlar va ular unda mangu qoluvchilardir” (Baqara surasi 257-oyat).
4-oyat:
أَحَسِبَ النَّاسُ أَنْ يُتْرَكُوا أَنْ يَقُولُوا آَمَنَّا وَهُمْ لَا يُفْتَنُونَ
Ya’ni, “Odamlar: “Imon keltirdik”, – deyishlari bilangina, sinalmagan hollarida qoldiriladilar, deb o‘yladilarmi?! (Ankabut surasi 2-oyat).
5-oyat:
الَّذِي خَلَقَ الْمَوْتَ وَالْحَيَاةَ لِيَبْلُوَكُمْ أَيُّكُمْ أَحْسَنُ عَمَلًا وَهُوَ الْعَزِيزُ الْغَفُورُ
«(U) sizlarning qaysi biringiz chiroyliroq (savobliroq) amal qiluvchi ekaningizni sinash uchun o‘lim va hayotni yaratgan zotdir. U Aziz (qudratli) va G‘afur (kechirimli)dir” (Mulk surasi 2-oyat).
6-oyat:
كُلُّ نَفْسٍ ذَائِقَةُ الْمَوْتِ وَنَبْلُوكُمْ بِالشَّرِّ وَالْخَيْرِ فِتْنَةً وَإِلَيْنَا تُرْجَعُونَ
Ya’ni, “Har bir jon o‘limning totuvchisidir. Biz sizlarni yomonlik bilan ham, yaxshilik bilan ham sinab, imtihon qilurmiz. (Keyin) Bizning huzurimizgagina qaytarilursiz» (Anbiyo surasi 35-oyat).
7-oyat:
يَا أَيُّهَا الَّذِينَ آَمَنُوا اصْبِرُوا وَصَابِرُوا وَرَابِطُوا وَاتَّقُوا اللَّهَ لَعَلَّكُمْ تُفْلِحُونَ
Ya’ni, “Ey, imon keltirganlar! Sabr qilingiz, bag‘rikeng bo‘lingiz va (Alloh yo‘liga) taxt bo‘lib turingiz va Allohdan qo‘rqingiz, zora (oxiratda) najot topsangiz!” (Oli Imron surasi 200-oyat)
8-oyat:
سَلَامٌ عَلَيْكُمْ بِمَا صَبَرْتُمْ فَنِعْمَ عُقْبَى الدَّارِ
Ya’ni, “(Alloh yo‘lida turli mashaqqatlarga) sabr qilib o‘tganlaringiz sababli (endi bu yerda) sizlarga tinchlik bo‘lgay. Dunyo oqibati (jannat) naqadar yaxshi!” (Ra’d surasi 24-oyat)
9-10-oyatlar:
اللَّهُ لَا إِلَهَ إِلَّا هُوَ الْحَيُّ الْقَيُّومُ لَا تَأْخُذُهُ سِنَةٌ وَلَا نَوْمٌ لَهُ مَا فِي السَّمَاوَاتِ وَمَا فِي الْأَرْضِ مَنْ ذَا الَّذِي يَشْفَعُ عِنْدَهُ إِلَّا بِإِذْنِهِ يَعْلَمُ مَا بَيْنَ أَيْدِيهِمْ وَمَا خَلْفَهُمْ وَلَا يُحِيطُونَ بِشَيْءٍ مِنْ عِلْمِهِ إِلَّا بِمَا شَاءَ وَسِعَ كُرْسِيُّهُ السَّمَاوَاتِ وَالْأَرْضَ وَلَا يَئُودُهُ حِفْظُهُمَا وَهُوَ الْعَلِيُّ الْعَظِيمُ
لَا إِكْرَاهَ فِي الدِّينِ قَدْ تَبَيَّنَ الرُّشْدُ مِنَ الْغَيِّ فَمَنْ يَكْفُرْ بِالطَّاغُوتِ وَيُؤْمِنْ بِاللَّهِ فَقَدِ اسْتَمْسَكَ بِالْعُرْوَةِ الْوُثْقَى لَا انْفِصَامَ لَهَا وَاللَّهُ سَمِيعٌ عَلِيمٌ
Ya’ni, “Alloh – Undan o‘zga iloh yo‘qdir. (U) hamisha Barhayot va abadiy Turuvchidir. Uni na mudroq tutar va na uyqu. Osmonlar va Yerdagi (barcha) narsalar Unikidir. (Qiyomat kuni) Uning huzurida kim ham (gunohkorlarni) Uning ruxsatisiz shafoat qila olardi?! (U) ulardan (odamlardan) oldingi va keyingi narsalarni bilur. (Odamlar) Uning ilmidan faqat (U) istagan miqdoricha o‘zlashtirurlar. Uning Kursiysi osmonlar va Yerni (ham) o‘z ichiga sig‘dira olur. U ikkisini muhofaza etish Uni toliqtirmas. U Oliy va Buyukdir”.
“Dinda zo‘rlash yo‘q, zero, to‘g‘ri yo‘l yanglish yo‘ldan ajrim bo‘ldi. Bas, kim shaytonni (yoxud butlarni) inkor etib, Allohga imon keltirsa, demak, u buzilmas, ishonchli halqani tutibdi. Alloh eshituvchi va biluvchidir” (Baqara surasi 255-256-oyatlar).
Alloh taolo barchamizni sinov va qiyinchiliklarni sabr bilan yenguvchi, har qanday holatda O‘zidan najot topguvchi va Kalomiga muhabbatli bandalaridan qilsin!
A.SAIDJAXONOV,
Bekobod tumani “Amirov Dadaxon” jome masjidi imom-xatibi tayyorladi
O‘MI Matbuot xizmati
Iymon 
Namoz 
Ro'za 
Zakot 
Haj 
Qur'on 
Islom saboqlari 
Aloqa 
