Savol: Bir kunda besh vaqt namoz bor, deymiz. Vitr namozi-chi? Yoki u xufton namozi tarkibiga kiradimi?
Javob: Yo‘q, vitr xufton namozi tarkibiga kirmaydi. U alohida namoz, lekin vaqti xufton namozi vaqtidir, Payg‘ambarimizga farz, ummatlariga esa (bizning mazhabga ko‘ra) vojib qilingan (Saraxsiy. “Muhit”). Chunki Rasululloh bunday marhamat qilganlar: “Ey Qur’on ahli, vitr namozini o‘qing! Zero, Alloh taolo toqdir, toqni yaxshi ko‘radi” (Imom Abu Dovud, Imom Termiziy rivoyati).
“Vitr” lug‘atda toq ma’nosini bergani uchun hadisda “Alloh taolo toqdir, toqni yaxshi ko‘radi”, deyilmoqda.
Vitr namozi xufton vaqti kirganidan boshlab kechaning oxirigacha o‘qilaveradi. Ammo xuftondan oldin o‘qish joiz emas. Agar vitr xufton namozining tarkibiga kirganida, uni kechaning oxirigacha kechiktirish makruh bo‘lardi. Holbuki, uni kechaning oxirigacha (bomdod vaqtiga qadar) kechiktirib o‘qish mustahabdir (“Tabyin”).
Hanafiylikda vitr namozi uch rakat. Har bir rakatida Fotiha surasi o‘qiladi. Uning birinchi rakatida A’lo, ikkinchi rakatiga Kofirun, uchinchi rakatiga Ixlos suralarini o‘qish mandubdir. Bunga Rasulullohning vitr namozini ana shunday o‘qiganlari haqidagi Imom Ahmad, Nasaiy va Ibn Mojaning Ubay ibn Ka’bdan rivoyat qilgan hadislari dalil bo‘ladi (“Fiqhul islam va adillatuhu”).
Vitr namozining uchinchi rakatida “Qunut” duosini o‘qish, sahih qavllarga ko‘ra, vojibdir (“Javharatun nayyira”).
“So‘ragan edingiz” kitobidan
O‘MI Matbuot xizmati