So‘nggi vaqtlarda muslim.uz ijodkorlari yangidan-yangi loyihalarni muxlislarga taqdim etishmoqda. Ayniqsa, “Onlayn ziyorat”, “Sog‘lom e’tiqod saboqlari” ruknlari ko‘pchilikka manzur bo‘ldi. Bularning bari din xizmati, xalq g‘ami va og‘irini yengil qilish uchun qilinmoqda.
Navbatdagi yangi “Fototanqid” loyihasida o‘ziga xos uslubni ishga solgan holda bino-inshootlardagi kishining dilini xira qiladigan holatlar, odamlarga noqulaylik tug‘diradigan vaziyatlar hamda dinimiz va o‘zligimizga to‘g‘ri kelmaydigan voqea-hodisalar haqida tanqidiy fotoreportajlar e’lon qilinadi.
Bu ishimiz bilan birovni xafa qilish, kamsitish yoki qandaydir foyda topishdan mutlaqo yiroqmiz. Maqsadimiz xarobani obod qilish, egrini to‘g‘rilash, johillikni yo‘qotish, beparvolikdan saqlanish va doimo diqqatli bo‘lishga chorlash kabilardan iborat. Zero, “Tanqid – kelajak mevasi” degan naql bir necha yildirki hayotda o‘z tasdig‘ini topmoqda.
Mashoyixlarning isloh qilishni oldin o‘z nafsingda boshla, degan hikmatlariga amal qilgan holda tanqid orqali tuzatishni avval o‘zimizning yon-atrofimizdan, masjid-madrasalardan boshladik.

O‘zbekiston musulmonlari idorasi Matbuot xizmati