— Bugungi kunda O‘zbekiston jadal sur’atlarda taraqqiy topmoqda. Prezident Shavkat Mirziyoyev tomonidan yuritilayotgan oqilona siyosat tashqi aloqalar rivojida muhim o‘rin tutayapti.
Jumladan, mamlakatlarimiz o‘rtasida savdo-iqtisodiy, fan-ta’lim, transport, madaniy hamda gumanitar, turizm sohalarida 60 dan ziyod shartnoma va bitimlar imzolangan bo‘lib, hamkorligimiz yildan-yilga mustahkamlanib borayotir. Parlamentlararo aloqalar xususida ham ana shunday iliq fikr bildirish mumkin.
O‘zbekiston barcha sohada juda katta yutuqlarni qo‘lga kiritmoqda. Buni bugun jahon hamjamiyati ham ko‘rib, bilib turibdi. Xususan, Turkiya bilan hamkorlikning kuchayishida ikki davlat rahbarlarining oliy darajadagi uchrashuvlari chog‘ida erishilgan kelishuvlar muhim asos bo‘layapti.
E’tirof etish joizki, O‘zbekiston rahbariyati sayyohlar oqimini ko‘paytirish bo‘yicha yangi, samarador chora-tadbirlarni ko‘rmoqda. Ko‘plab davlatlar fuqarolariga viza berish tartibi soddalashtirildi. Shular qatorida joriy yilning 10 fevralidan boshlab, Turkiyadan kelayotgan turistlarga ham O‘zbekistonda 30 kungacha vizasiz bo‘lishga ruxsat berildi.
O‘zbekiston ham, Turkiya ham turizm sohasida ulkan imkoniyatlarga ega. Ushbu salohiyatdan to‘liq foydalanish, turistik almashinuvni o‘stirish iqtisodiyot rivojiga katta turtki beradi. Bizning fuqarolarimiz Toshkent, Buxoro, Samarqand, Xiva kabi shaharlarning diqqatga sazovor joylarini ko‘rish, Imom Buxoriy, Imom Termiziy, Baxouddin Naqshband majmualari kabi muqaddas qadamjolarga ziyorat qilishni orzu qilishadi. Hozirgi kunda O‘zbekistondan Turkiyaga, Turkiyadan O‘zbekistonga qo‘shimcha aviaqatnovlarni yo‘lga qo‘yish bo‘yicha muzokaralar olib borayapmiz. Nega deganda, buning uchun salohiyat ham, imkoniyat ham yetarli. Bundan unumli foydalansak, ayni muddaodir. O‘tgan yili Turkiyadan O‘zbekistonga 50 ming nafar kishi turist sifatida keldi. Bu, albatta, ko‘p emas. Tashrif chog‘ida ana shu masalalarni ham muhokama qilayapmizki, kelgusida bu ko‘rsatkich sezilarli darajada ortadi.
Turkiya O‘zbekistonning asosiy savdo sheriklaridan biri hisoblanadi. O‘zaro savdo aylanmasida o‘sish kuzatilmoqda. Biroq bu hali ikki do‘st mamlakatning mavjud salohiyatini to‘la aks ettirmaydi. Shu bois kelgusida savdo hajmini 2-3 marotaba oshirish ko‘zda tutilgan.
Dilimdagi yana bir gapni aytmoqchiman. Prezident Shavkat Mirziyoyevning Oliy Majlis palatalariga Murojaatnomasini katta hayajon bilan o‘qidim, tanishib chiqdim. Unda parlament oldiga ulkan masalalar qo‘yilgan, qonun ustuvorligini ta’minlash, ijtimoiy masalalarni bosqichma-bosqich hal qilishga alohida e’tibor qaratilgan. Ayniqsa, Murojaatnomada tadbirkorlikni rivojlantirish, ularga zarur shart-sharoitlar yaratish bo‘yicha istiqbolli g‘oya hamda takliflar ilgari surilgani katta taassurot qoldirdi.
Ishonamizki, o‘zaro ishonch va manfaatga yo‘g‘rilgan ikki davlat aloqalari bundan keyin jadal rivojlanaveradi.

O‘zbekiston musulmonlar idorasi matbuot xizmati