Navoiy viloyati respublikamizning yer maydoni katta, tabiiy boyliklari mo‘l, ishlab chiqarish sanoati yaxshi rivojlangan, “Qosim shayx” ziyoratgohi, Jaraquduqdagi “Tosh o‘rmon”i, “Raboti Malik” karvonxonasi, “Mir Said Bahrom” maqbarasi, “Nurota Chashma” tarixiy me’moriy majmuasi kabi qadimiy ziyoratgohlari ko‘plab madaniy obidalarga boy, bir million atrofidagi turli millat vakillari ahil-inoqlikda hayot kechirib kelayotgan o‘lka hisoblanadi.
O‘tgan kuni viloyatga tashrifi yakunlangan davlatimiz rahbari viloyat aholisi hayoti bilan yaqindan tanishdi, oddiy odamlar bilan muloqotlar qildi. Viloyatning istiqboldagi taraqqiyot strategiyasini belgilab berar ekan odamlarni ish bilan ta’minlash, o‘sib kelayotgan yoshlarimizga yangi ish o‘rinlari yaratib borish masalasiga e’tibor qaratdi.
Mehribon Parvardigorimiz “Yerda o‘rmalagan narsa borki, barchasining rizqi Allohning zimmasidadir. U Zot ularning turar joylarini ham, borar joylarini ham bilur. Hamma narsa ochiq-ravshan Kitobda bordir”(Hud, 6), deb bandalarini xotirjam qilib qo‘yar ekan, insonlarga o‘sha O‘zi va’da qilgan rizqni topishga davlat rahbarlarini vasila qilib qo‘yadi.
Rabbimizning ushbu oyatiga muvofiq ish tutgan prezidentimiz “Odamlarning dunyoqarashi, mehnatga munosabati o‘zgarmoqda. Dunyoqarashni nima o‘zgartiradi – ilm, daromad, manfaat”, der ekan xalqimizning ko‘nglidagi e’tirofni topib aytdi.
Haqiqatan, keyingi vaqtlarda odamlarning hayotga munosabatida kuchli o‘zgarish yuz bermoqda, yangi-yangi loyihalar, rejalar tuzmoqda. Chunki xalqimiz endilikda qilingan mehnatlari besamar ketmasligiga, albatta, ularning ijobiy natijalar berishiga ishonch hosil qilmoqda. Mehnatining mahsulidan bahramand bo‘lishidan haqli ravishda umid qilib shijoat bilan ishlamoqda.
Viloyatda yangi ochilayotgan yangi ish o‘rinlariga e’tibor qiling:
Navoiy kon-metallurgiya kombinatida 2026 yilga borib 30 mingdan ortiq qo‘shimcha ish o‘rni yaratiladi;
Karmana tumanidagi «Karmana golden eggs» mas’uliyati cheklangan jamiyatida ellik ish o‘rni yaratildi. 2019 yilda yana 100 kishi ish bilan ta’minlanadi;
«Navoiy» erkin iqtisodiy zonasida 2010-2016 yillarda 22 ta loyiha amalga oshirilgan bo‘lib, 904 ish o‘rni yaratilgan. 2017-2019 yillarda 32 ta loyiha amalga oshirilib, 1659 ta ish o‘rni yaratiladi;
Shuningdek, «To‘dako‘l» suv havzasida ochiladigan baliqchilik majmuasiga 1200 gektar yer ajratiladi. Bu yerda eronlik investorlar bilan birgalikda yiliga 5000 tonna baliq, 4000 tonna qayta ishlangan baliq mahsulotlari (baliq filesi, farshi, dudlangan baliq) tayyorlanadi;
Nurota tumanida 10 ming gektar lalmi yerda intensiv pista plantatsiyalari loyihasi tashkil etiladi. Natijada 850 kishi doimiy ish bilan ta’minlanadi;
Xatirchida bog‘ va zamonaviy issiqxona barpo etiladi, meva-sabzavotlar qayta ishlanadi, Navbahor tumanida tomchilatib sug‘orish usulida bodom va pista plantatsiyalari ochiladi, qorako‘lchilik, tivit junli echkilarni ko‘paytiriladi;
“Uchquduq tekstil” MCHJda joriy yilda tayyor kiyim-kechak ishlab chiqarish yo‘lga qo‘yiladi. Natijada 320 kishi ish bilan ta’minlanadi;
“Qizilqum marvaridi” korxonasida gidroponika usulida issiqxona barpo etiladi;
Zarafshon shahrida yiliga 4,5 ming tonna armatura, 10 million kvadrat metr oyna, 250 million dona shisha idish ishlab chiqarish, qariyb 2 ming boshga mo‘ljallangan qoramolchilik kompleksi, sig‘imi 500 va 200 tonna bo‘lgan muzlatkichli omborxonalar barpo etish, 100 ming boshdan ziyod parranda boqish, baliqchilik xo‘jaligi, issiqxonalar tashkil etish loyihalari amalga oshiriladi.
Tomdi, Konimex tumanlarida ham shu kabi istiqbolli loyihalar hayotga tatbiq etiladi. Natijada ikki yil ichida 4 ming ish o‘rni yaratish ko‘zda tutilgan.
Konimex tumanida ming bosh tuya va 500 bosh naslli echki boqishga mo‘ljallangan chorvachilik kompleksi barpo etish rejalashtirilyapti. Bu joy nafaqat tuya va echkichilik majmuasi, balki yiliga 10 ming sayyohni qabul qiladigan zamonaviy ekoturizm markaziga aylanadi;
Tomdi tumanidagi Navoiy kon-metallurgiya kombinatiga qarashli 4 ming bosh qo‘y boqishga mo‘ljallangan chorvachilik kompleksi ham shunday istiqbolli loyihalardan bo‘lib, viloyatda qorako‘lchilikni rivojlantirish va yangi ish o‘rinlari yaratishga xizmat qiladi. 

Bundan tashqari, yana qanchadan-qancha yangi o‘rinlari ochilmoqdaki, inshoalloh, yaqin yillarda viloyatda ishsizlar soni keskin kamayadi va aholining turmush darajasi yuksaladi.
Bugungi dunyoda shunday davlatlar borki, ularning poytaxti va industriya shaharlari beqiyos darajada taraqqiy etib ketgan. Ular xorijlik sayyohlarga ham diplomatlarga ham o‘sha joylarni namoyish etadi. Mamlkatning chekka hududlari esa taraqqiyotdan juda ham ortda qolib ketgan, aholi nochor ahvolda yashaydi. Prezidentimiz davlatning ana shu kabi stixiyali rivojlanishining oldini olish masalasiga ham e’tibor qaratmoqda. O‘zbekiston megapolislari rivojlanib ketib chekka hududlar ortda qoladigan davlatlardan bo‘lmasligi kerak. Mamlakatning barcha hududi rivojlanish bosiqichini hamohangda bosib o‘tmog‘i; bir hududning aholisi yaxshi yashab, boshqasi qiynalib yashamasligi darkor.
Yurtboshimiz: “Olisda joylashgan bu shaharlar aholisi yaxshi yashashga haqli”, deganda ana shu prinsipni nazarda tutib gapirdi.
Ta’bir joiz bo‘lsa, aynan ana shu holat, ya’ni mamlakatning barcha aholisiga bir xil sharoit yaratib berish – prezidentimizning dunyoning juda ko‘plab davlatlari rahbarlari yetisha olmayotgan adolati hisoblanadi.
Qur’oni karimda: «Darhaqiqat, Alloh omonatni o‘z egalariga topshirishingiz va odamlar o‘rtasida hukm qilganingizda adolat bilan hukm qilishingizga buyurar...» (Niso, 58).
Alloh taolo yurtimizga bosh bo‘lib, tunu kun xalqimiz farovonligini o‘ylayotgan, adolatni dasturulamal qilib olgan davlatimiz rahbarining ishlarini barakali qilsin, sog‘ligini mustahkam aylasin.

O‘MI Matbuot xizmati