2 mart kuni O‘zbekiston musulmonlari idorasida O‘zbekiston yoshlar tadbirkorligini qo‘llab-quvvatlash markazi bilan hamkorlikda “Halol kasb – farovonlik omili” mavzusida seminar-trening bo‘lib o‘tdi. Ushbu tadbir joriy yilni “Faol tadbirkorlik, innovatsion g‘oyalar va texnologiyalarni qo‘llab-quvvatlash yili”, deb e’lon qilinishi munosabati bilan O‘zbekiston musulmonlari idorasi va O‘zbekiston yoshlar ittifoqi Markaziy Kengashi o‘rtasida tuzilgan Memorandum doirasida o‘tkazildi.
Tadbirda Yoshlar ittifoqi vakillari, yosh tadbirkorlar, soha mutaxassislari, diniy ta’lim muassasalari professor-o‘qituvchilari, ulamolar, imom-xatiblar, Toshkent islom instituti va madrasalar talaba-yoshlari ishtirok etdi.
Uchrashuvda Islom dinida bayon qilingan tijoratning qonun-qoidalari, odoblari hamda halol mehnat insonning ikki dunyosini obod qilishi haqida so‘z yuritildi. To‘g‘ri kasb-kor orqali qut-baraka kelishi, halol tirikchilik ibodat darajasiga ko‘tarilgani, unga katta ajr-savoblar ato etilishi to‘g‘risida ma’lumotlar berildi. O‘z navbatida bugun Davlatimiz rahbari tomonidan tadbirkorlarga keng yo‘l ochilgani, qulayliklar berilgani, qo‘llab-quvvatlovchi choralar ko‘rilgani hamda turli sun’iy to‘siq va cheklovlar olib tashlanganini alohida ta’kidlandi.

O‘zbekiston musulmonlari idorasi raisi o‘rinbosari Shayx Abdulaziz Mansur muloqotda so‘zga chiqib, tijorat bilan shug‘ullanuvchi inson eng avvalo niyati to‘g‘ri bo‘lishi, ya’ni halol mehnati bilan avvalo oilasini pokiza rizq ila boqishi, jamiyat va yurtga foyda keltirishi lozimligini tushuntirdi.
Zero, halol kasb obod turmush garovidir. Inson o‘z qo‘l mehnati orqali rizq talab qilishi esa vojib amaldir. Alloh taolo marhamat qilib aytadi: “Ey imon keltirganlar! Mol-mulklaringizni o‘rtada nohaq (yo‘llar) bilan yemangiz! O‘zaro rozilik asosidagi tijorat bo‘lsa, u bundan mustasno” (“Niso” surasi, 29-oyat).
Tadbirda diniy idora mas’ul xodimi Isoqjon Begmatov so‘zga chiqib, tijorat qilishda kerakli bilim va diniy ko‘rsatmalarga rioya etish, birovning haqidan ehtiyot bo‘lish hamda durust savdo bilan nodurust savdoni ajratish zarurligini izohladi. Shuningdek, savdo-sotiq borasidagi Islom dini ko‘rsatmalari, halol-haromning farqlari, o‘tmishdagi ibratli voqealar va ulug‘lar o‘gitidan namunalar keltirdi. Jumladan, Hazrat Umar roziyallohu anhu davrlarida tobeinlarning ulug‘lari bozorlarni aylanishlari va bozordagi sotuvchilardan tijoratga doir masalalarni so‘rashlari, javob berolmaganlarni to o‘rganib kelmaguncha bozordan chetlatilganini so‘zlab berildi.
Isoqjon Begmatov so‘zida davom etib, agar tadbirkor halollikni shior qilib mehnat qilsa, kelishmovchiliklar barham topishini aytib, insonlar orasida bir-birga ishonch va ishda baraka bo‘lishini aytdi. Erta tongdan pokiza rizq topaman, oilamni boqaman, degan pok niyatda yo‘l olgan kishiga Alloh taolo huzurida katta savoblar yozilishi, Hazrati Payg‘ambarimiz sollallohu alayhi va sallamning: “Kim halol mehnat qilib, horib charchagan xolda tunasa, gunohlari kechirilgan xolda tunaydi”, degan hadisi shariflarining mazmun-mohiyatini tushuntirdi.

Haqiqatan, har bir payg‘ambar o‘z qalbini Alloh zikri band qilib, halol mehnat ila rizq topishni o‘z burchi deb bilgan. Odam alayhissalom dehqonchilik, Idris alayhissalom temirchilik, Muso alayhissalom cho‘ponlik qilganlar. Hazrati Payg‘ambarimiz sollallohu alayhi va sallam tijorat bilan shug‘ullanganlar.
Payg‘ambarlardan meros qolgan ushbu qadriyat keyinchalik valiy zotlar tomonidan davom ettirilgan. Ulug‘ zotlar ushbu an’anaga sadoqat bilan yondoshishgan. Aziz avliyolar ishsiz, ma’lum kasb-hunar egasi bo‘lmagan insonlarni muridlikka qabul qilmaganlar, o‘zlari albatta biror kasb-hunar bilan mashg‘ul bo‘lganlar. Xoja Ali Rometaniy – to‘quvchi, Muhammad Boboyi Samosiy – bog‘bon, Sayyid Amir Kulol – kulol, Bahouddin Naqshband – naqqosh, to‘quvchi, Xoja Ubaydulloh Ahror – chorvador va savdogar bo‘lishgan.
Bu an’ana asrlar davomida qalbini imon halovati, jismini mehnat rohati bilan oziqlantirgan komil insonlarning ko‘payishiga katta omil bo‘lgan.

So‘zga chiqqan notiqlar bugungi kunda dunyo aholisining taxminan 1,8 milliardini, ya’ni yer aholisining 24 foizini musulmonlar tashkil etishi, “Halol” belgisi ostida ishlab chiqarilayotgan mahsulotlar va xizmatlarga talabning oshayotgani, hatto, Yevropa, AQSH, Avstraliya, Kanada, Xitoy, Hindiston, Lotin Amerikasi davlatlari ham bu masalaga alohida e’tibor qaratilayotganini qayd etishdi.
Bugungi kunda mo‘min-musulmonlar tomonidan halol, pokiza oziq-ovqat mahsulotlari va xizmatlarga bo‘lgan talab ortib borayotgani hamda ishlab chiqaruvchilar tomonidan “Halol sertifikat” joriy etish bo‘yicha murojaatlarni inobatga olib, “O‘zstandart” agentligi tomonidan “Halol” standarti qabul qilingani, “Halol sertifikat” yo‘riqnomasi va ushbu ish bilan bevosita shug‘ullanadigan ulamolar hay’ati tuzilganini ma’lum qilindi.

Tadbir yakunida yosh tadbirkorlarning qiziqtirgan savollariga O‘zbekiston musulmonlari idorasi ulamolari tomonidan batafsil javob berildi. Shu bilan birga halol tadbirkorlik sir-asrorlarini bilish masalasida diniy idoraning eshiklari ular uchun har doim ochiq ekani, har qanday savol yoki masala yuzasidan bevosita idora mas’ul xodimlariga yoki idoraning rasmiy muslim.uz portali orqali ham murojaat etishlari eslatib o‘tildi.
Shundan so‘ng tadbir ishtirokchilari “Hazrati Imom” majmuasidagi tarixiy obidalar, osori atiqalar va ma’naviy meroslarimizni ziyorat qilib, ruhiy quvvat olishdi.

O‘zbekiston musulmonlari idorasi
Matbuot xizmati