O'zbekiston fuqarolari uchun BAAga kirish vizalari bekor qilindi
BAA Tashqi ishlar vazirligida O'zbekiston Respublikasi Hukumati bilan Birlashgan Arab Amirliklari Hukumati o'rtasida kirish viza talablaridan o'zaro ozod etish to'g'risidagi hamkorlik protokoli imzolandi, deb xabar bermoqda «Dunyo» AA muxbiri.
Hujjatga ko'ra, O'zbekiston fuqarolari 30 kundan oshmagan muddatda BAA hududida bo'lishi davrida viza talablaridan ozod etiladi.
Ma'lumot uchun: 2023 yil davomida BAAga 119 454 nafar O'zbekiston fuqarolari tashrif buyurgan va 9,2 million AQSh dollari miqdorida viza rasmiylashtirish uchun sarflaydi.
Hukumatlararo hamkorlik protokoli O'zbekistonning BAAdagi elchisi Abdulaziz Aqqulov va BAA Tashqi ishlar vaziri o'rinbosari Holid Abdulla Belhul tomonidan imzolandi.
Hujjat rasman 2024 yil 16 fevraldan kuchga kirdi.
Imzolangan hujjat O'zbekiston fuqarolari uchun viza rasmiylashtirmasdan boriladigan mamlakatlar sonini 29 taga etkazib, O'zbekistonni Global Passport Power reytingida 71 o'ringa ko'taradi.
O'zbekiston musulmonlari idorasi
Matbuot xizmati
“Arab Tourist”: Samarqand, Buxoro va Xiva — islom sivilizatsiyasi va jahon madaniy merosining bebaho durdonalari
Saudiya Arabistonining turizm va sayohatlarga ixtisoslashgan “Arab Tourist” elektron nashrida “Markaziy Osiyoning qoq markazida joylashgan va Buyuk ipak yo‘li bilan bog‘langan mamlakat” sarlavhali tahliliy maqola e’lon qilindi, deb xabar bermoqda “Dunyo” AA.
Maqolada Buyuk ipak yo‘li tarixida o‘zbek shaharlarining tutgan o‘rni alohida e’tirof etiladi. Xususan, Samarqand, Buxoro va Xiva kabi tarixiy shaharlar asrlar davomida Sharq va G‘arb o‘rtasidagi savdo, fan va madaniyat markazlari sifatida xizmat qilgani ta’kidlanadi. Registon maydoni, Ichan-qal’a va Buxorodagi me’moriy obidalar islom sivilizatsiyasi hamda jahon madaniy merosining bebaho durdonalari sifatida tilga olinadi.
Bundan tashqari, nashr O‘zbekistonning rang-barang tabiati va geografik relefiga to‘xtalib o‘tgan. Qizilqum cho‘li, serhosil Farg‘ona vodiysi, Tyan-Shan va Pomir-Oloy tog‘ tizmalari aholi joylashuvi va qishloq xo‘jaligi rivojida muhim o‘rin tutishi qayd etiladi.
Nashr, shuningdek, Buyuk Mirzo Ulug‘bek kabi donishmandlarning astronomiya va matematika sohasidagi buyuk kashfiyotlarini alohida e’tirof etgan.
Xulosada ta’kidlanganidek, Toshkent, Samarqand, Buxoro, Namangan va Andijon kabi shaharlar bugungi kunda nafaqat ma’muriy va iqtisodiy, balki jadal rivojlanayotgan yirik madaniy-turistik markazlar sifatida dunyo sayyohlari e’tiborini o‘ziga jalb etmoqda.
O‘zbekiston musulmonlari idorasi Matbuot xizmati
