1-2 mart kunlari Hindiston Bosh vaziri Narendra Modining taklifiga asosan Iordaniya Qiroli Abdulloh II Hindistonda rasmiy tashrif bilan bo‘lib turibdi. Bu haqda “Times of India” nashri xabar berdi. 

Tashrif doirasida ko‘plab uchrashuvlar va davra suhbatlari tashkil etilgani xabar qilinmoqda. 1 mart, payshanba kuni o‘tkazilgan tadbirlar doirasida Hindiston Bosh vaziri Narendra Modi Islom dini haqidagi fikrlarini bildirib, “Terrorga qarshi kurash Islom yoki musulmonlarga qarshi urush emas”ligini aytib o‘tdi. 

Bosh vazir “Islom merosi: o‘zaro tushunish va boshqaruvni rag‘batlantirish” mavzusidagi konferensiyada “Bizning ko‘p fikrli demokratiyamiz ekstremizmga qarshi kurashda bizga kuch-qudrat beradi”, deb aytdi. 

Hindiston Bosh vaziri Narendra Modi Hindiston yoshlari Islom dinining insoniylik jihatlari bilan tanishishi kerakligini, va ayni paytda, zamonaviy texnologiyalardan ham foydalana olishi kerakligini aytib o‘tgan. 

“Musulmon yoshlarining bir qo‘lida Qur’on, ikkinchisida kompyuter bo‘lishi kerak”, - deya so‘ziga qo‘shimcha qildi Hindiston Bosh vaziri. 

Anjumanda ishtirok etayotgan Iordaniya Qiroli Abdulloh II “Din nomidan uyushtirilgan hujum – dinga qarshi uyushtirilgan hujumdir. Din nomidan nafrat tarqatayotgan shaxslarning kimligi aniqlanishi va rad etilmog‘i lozim”, - deya bayonot berdi. 

O‘MI Matbuot xizmati