“Tasavvuf allomalari” kitobi taqdimoti
1 mart kuni O‘zbekiston musulmonlari idorasi kutubxonasi fondida saqlanayotgan tarixchi-manbashunos olim Komilxon Kattayevning “Tasavvuf allomalari” nomli kitobi taqdimoti bo‘lib o‘tdi. Unda tasavvuf olimlari, professor-o‘qituvchilar, ulamolar, imom-xatiblar va talaba-yoshlar ishtirok etdi.
Tadbir avvalida Qur’oni karim oyatlaridan tilovat va duo qilinib, so‘ng muallif Komilxon Kattayevga so‘z berildi. Muallif mazkur kitobning yozilish tarixi, ustozlarning beqiyos ko‘magi, keltirilgan ma’lumotlar ilmiy asosga ega ekani, asarda keltirilgan aziz avliyolar haqida ma’lumot berdi.
O‘zbekiston musulmonlari idorasi raisi o‘rinbosari Shayx Abdulaziz Mansur “Tasavvuf allomalari” kitobi haqida gapirar ekan, muallif ushbu kitobni yozishda juda ko‘p mehnat qilgani, soha mutaxassislari va tarixiy manbalarga murojaat etganini bildirdi. Imom Termiziy xalqaro ilmiy- tadqiqot markazi direktori, tarix fanlari doktori, professor Ubaydulla Uvatov yurtimizdan yetishib chiqqan allomalarning qabrlarini topishda Komilxon Kattayev juda katta hissa qo‘shganini ma’lum qildi. Jumladan, Imom Moturidiy va Burhoniddin Marg‘inoniy kabi ko‘plab allomalarning qabrlarini topishda ishtirok etganini aytib o‘tdi.
O‘zbekiston Fanlar Akademiyasi Til va adabiyot institutining katta ilmiy xodimi Sayfiddin Sayfulloh tarixchi-manbashunos olim Komilxon Kattayevning “Tasavvuf allomalari” kitobida ulug‘ avliyolar va orif zotlarning hayoti va ijodi qalamga olingani, mamlakatimiz taraqqiyotining yangi davrida ma’naviy merosimizga yangicha yondoshish tufayli tasavvuf allomalariga bo‘lgan e’tibor katta bo‘layotganini bildirdi. Endilikda ularning ilmiy-ma’rifiy meroslarini o‘rganish, hayotga tatbiq etish ulkan ijobiy natijalarni berishini alohida ta’kidladi.
Shuningdek, tadbirda professor o‘qituvchilar, soha mutaxassislari ham so‘zga chiqib, muallifning ijodiga ulkan muvaffaqiyatlar tilashdi.
O‘zbekiston musulmonlari idorasi Matbuot xizmati
Bir guruh diniy-ma’rifiy soha fidoyilariga "O‘zbekiston Respublikasi mustaqilligining 35 yilligi" esdalik nishonlari topshirildi
27 avgust kuni O‘zbekiston Respublikasi mustaqilligining 35 yilligi munosabati bilan diniy-ma’rifiy sohada samarali mehnat qilib kelayotgan fidoyi yurtdoshlarimizni taqdirlashga bag‘ishlangan tantanali tadbir bo‘lib o‘tdi.
Tadbirda O‘zbekiston Respublikasi Prezidentining diniy-ma’rifiy masalalar bo‘yicha maslahatchisi Muzaffar Komilov kirish so‘zi bilan ishtirok etdi.
Kirish nutqida mamlakatimizda mustaqillik yillarida, ayniqsa, so‘nggi yillarda diniy-ma’rifiy sohani rivojlantirish, jamiyatda tinchlik-totuvlik, millatlararo hamjihatlik va diniy bag‘rikenglikni mustahkamlash borasida amalga oshirilayotgan islohotlar, shuningdek, sohada faoliyat yuritayotgan ulamolar, imom-xatiblar, mudarrislar va fidoyi xodimlarning munosib hissasi haqida alohida ta’kidlandi.
Tantanali tadbir davomida diniy-ma’rifiy sohada ko‘p yillardan buyon samarali mehnat qilib, yurtimizda ma’naviy barqarorlikni ta’minlash, yosh avlodni milliy va umuminsoniy qadriyatlar ruhida tarbiyalash, aholi o‘rtasida ma’rifiy tushuntirish ishlarini olib borishga munosib hissa qo‘shib kelayotgan bir guruh fidoyi yurtdoshlarga "O‘zbekiston Respublikasi mustaqilligining 35 yilligi" esdalik nishonlari tantanali ravishda topshirildi.
Esdalik nishonlarini topshirish marosimida O‘zbekiston Respublikasi Prezidentining diniy-ma’rifiy masalalar bo‘yicha maslahatchisi Muzaffar Komilov, Din ishlari bo‘yicha qo‘mita raisi Sodiq Toshboyev, O‘zbekiston musulmonlari idorasi raisi, muftiy Shayx Nuriddin Xoliqnazar hazratlari, O‘zbekistondagi Islom sivilizatsiyasi markazi direktori Firdavs Abduhalikov, O‘zbekiston Respublikasi Vazirlar Mahkamasi mas’ul xodimi Orifxon Zokirovlar ishtirok etdilar.
Taqdirlash marosimida ta’kidlanganidek, mazkur esdalik nishoni mamlakatimiz taraqqiyotiga, uning tinchligi va barqarorligiga, jamiyatda millatlararo totuvlik va diniy bag‘rikenglik muhitini mustahkamlashga, yosh avlodni milliy va umuminsoniy qadriyatlar ruhida tarbiyalashga munosib hissa qo‘shayotgan fidoyi insonlarga bildirilgan yuksak ehtirom va e’tirof ramzidir.
Tadbir yakunida taqdirlanganlar o‘zlariga bildirilgan yuksak ishonch va e’tibor uchun minnatdorlik bildirib, mamlakatimiz tinchligi va ravnaqi yo‘lidagi ezgu faoliyatlarini yanada sidqidildan davom ettirishlarini ta’kidladilar.
Barcha mukofot sohiblarini samimiy muborakbod etamiz!
Mustaqilligimizning 35 yilligi muborak bo‘lsin!
O‘zbekiston musulmonlari idorasi Matbuot xizmati
