Namozga viqor bilan keling
Savol: Ba’zilar namoz boshlanganida masjidga (jamoatga yetish uchun) yuguradi. Shu to‘g‘rimi?
Javob: Bu xato. Abu Qatoda roziyallohu anhudan rivoyat qilinadi: «Biz Payg‘ambar sollallohu alayhi vasallam bilan namoz o‘qiyotgan edik. Odamlarning oyoq tovushlari eshitildi. Payg‘ambarimiz namozni tugatgach, ulardan: “Sizlarga nima bo‘ldi?” deb so‘radilar. Ular: “Namozga shoshildik”, deyishdi. Rasululloh sollallohu alayhi vasallam: “Unday qilmanglar. Agar namozga kelsalaring, xotirjamlik bilan kelinglar. Namozning qanchasiga yetsalaring, uni o‘qinglar, qanchasini o‘tkazib yuborsalaring, uni (o‘zlaringiz) to‘ldirib qo‘yinglar”, dedilar».
Shuning uchun namozga viqor bilan kelish, shoshmay niyat qilib, safga turish kerak.
“So‘ragan edingiz” kitobidan
Buxoroda 600 dan ortiq abituriyent imtihon topshirdi (fotolavha)
O‘zbekiston musulmonlari idorasi tasarrufidagi oliy va o‘rta maxsus diniy ta’lim muassasalariga 2026-2027 o‘quv yili uchun kirish test sinovlarining 5-hudud (Buxoro viloyati) bo‘yicha imtihon jarayonlari Mir Arab oliy madrasasi binosida bo‘lib o‘tdi.
Mazkur hudud bo‘yicha diniy ta’lim muassasalariga hujjat topshirgan 657 nafar abituriyent test sinovlarida ishtirok etdi.
Imtihonlarning shaffofligi, adolatliligi hamda tartib-intizomini ta’minlash maqsadida jarayonlarga Din ishlari bo‘yicha qo‘mita va O‘zbekiston musulmonlari idorasi mas’ul rahbarlari, diniy ta’lim muassasalari mutasaddilari, pedagog-o‘qituvchilar hamda ichki ishlar va tibbiyot xodimlari jalb etildi.
Test sinovlari boshlanishidan oldin abituriyentlarga imtihon topshirish tartibi va baholash mezonlari batafsil tushuntirildi. Barcha jarayonlar belgilangan talab va qoidalarga muvofiq, yuqori darajada tashkil etildi.
Tashkilotchilar test jarayonlarining shaffof va tartibli o‘tishiga yaqindan ko‘maklashgan Buxoro shahar ichki ishlar organi, sog‘liqni saqlash boshqarmasi tibbiyot xodimlari hamda diniy ta’lim muassasalari vakillariga o‘z minnatdorligini bildirdilar.
O‘zbekiston musulmonlari idorasi
Matbuot xizmati
