O`zbekiston musulmonlari idorasi

Koka-Kola Qoraqalpog‘istonga investitsiya kiritmoqda

27.02.2018 2887 2 min.

Koka-Kola jamg‘armasi BMTning Orol dengizi bo‘yicha qo‘shma dasturi doirasida Qoraqalpog‘iston Respublikasining Taxtako‘pir tumanida suv ta’minotini yaxshilash loyihasiga 100 ming AQSH dollari miqdorida investitsiya kiritmoqda.

BMT ma’lumotlariga ko‘ra, bugungi kunda sayyoramiz aholisining 40 foizdan ortig‘i ichimlik suvi tanqisligidan aziyat chekmoqda. 884 million kishi toza suv ta’minotidan mahrum, 1,7 milliarddan ko‘proq odam qo‘shimcha chuchuk suv manbalariga ehtiyoj sezmoqda.

Orol dengizi qurishi natijasida Qoraqalpog‘istonda ham bir qator ijtimoiy-iqtisodiy va ekologik muammolar vujudga kelgan. Mahalliy aholining faqatgina 50,8 foizi markazlashgan suv ta’minotidan foydalanish imkoniga ega. Uzoq tumanlar aholisi joylarda o‘rnatilgan suv manbalari hamda chuqurligi 400-500 metrlik artezian quduqlardan olinadigan suvni iste’mol qilmoqda.

Taxtako‘pir tumanidagi «Ata ko‘l» qishloq fuqarolar yig‘inining «Maqpal ko‘l» ovulida aholining ichimlik suviga ehtiyoji qo‘l nasoslari orqali ta’minlanadi. Bu esa salomatlik va sanitariya borasida qator muammolarni yuzaga keltirmoqda.

Koka-Kola jamg‘armasi va Global suv resurslari muammolari bo‘yicha tashkilot tomonidan Yangi olam dasturining moliyaviy ko‘magida amalga oshirilayotgan «Orolbo‘yidagi qishloq hududlarida ichimlik suvi ta’minotini yaxshilash» loyihasi doirasida 2018 yil oxirigacha tumanda suv taqsimlash stansiyasini tiklash ishlari amalga oshiriladi. Natijada 2 mingga yaqin odam toza ichimlik suvidan foydalanish imkoniga ega bo‘ladi.

Mahalliy aholini jalb qilgan holda ijtimoiy loyihalarni amalga oshirishda ko‘mak berish BMTning hududda amalga oshirilayotgan «Orol mintaqasi uchun inson xavfsizligi bo‘yicha ko‘p tomonlama sheriklik fondini tashkil qilish orqali Orol fojiasidan jabr ko‘rgan aholining turmush sharoitini yaxshilash» qo‘shma dasturining muhim yo‘nalishlaridan biri hisoblanadi. BMT Taraqqiyot dasturi, Qoraqalpog‘iston Respublikasi Vazirlar kengashi va Taxtako‘pir tumani hokimligi hamkorligida amalga oshirilayotgan mazkur loyiha Yangi olam dasturi tomonidan ham qo‘llab-quvvatlandi.

Yangi loyiha doirasida tuman hokimligi va aholi ishtirokida ta’lim va tibbiyot muassasalarida sanitariya-gigiyena masalalariga bag‘ishlangan turkum seminarlar tashkil etiladi.

Manba: http://uza.uz

O'zbekiston yangiliklari