Hazrati Payg‘ambarimiz Muhammad sollallohu alayhi va sallam: “Ibodatdan keyingi eng afzal amallardan biri mo‘minlar qalbiga xursandchilik bag‘ishlash”, deb marhamat qilganlar. Haqiqatan ham, bir insonga yaxshilik qilib, uning ko‘nglini ko‘tarish, ruhiy tasalli berish – dinimizda ajri ulug‘ amal hisoblanadi. Ayniqsa, yosh bolalar va go‘daklarga mamnunlik ulashish yanada savobi ulug‘ amaldir.
Mana shunday hikmatni o‘ziga shior qilib olgan, Toshkent shahri Mirobod tumanidagi “al-Badr” jome masjidi imom-xatibi Odiljon Xolmurodov boshchilik mahalla faollari muntazam ravishta xayrli ishlarga qo‘l urib kelishmoqda.
O‘tgan kuni masjid va mahalla mas’ullari tomonidan “Tong yulduzi” mahallasidagi Sayxun ko‘chasi 37-uyda yashovchi 5 yoshli Azizbek va 3 yoshli Asadbek ismli bolalarni otasiz voyaga yetkazayotgan Taxminaxon Abduvaitovaning oilasi ahvolidan xabar olinib, uning farzandlariga umra safariga ketayotgan saxovatpesha kishilar ko‘magida ikkita krovat hadya qilindi.
Xalqimizga xos saxovat, mehr-oqibat, hamjihatlikning o‘ziga xos ko‘rinishi bo‘lgan bu kabi xayrli ishlar yurtimizda yosh avlod ta’lim-tarbiyasi va ularning shart-sharoitini yaxshilashga bo‘lgan e’tiborning yanada ravnaq topayotganidan dalolatdir.

O‘zbekiston musulmonlari idorasi Matbuot xizmati