Ma’lumki, yaqinda Prezidentimiz Shavkat Mirziyoyev Buxoro viloyatiga safarini aziz-avliyolar qabrini ziyorat qilishdan boshladi. Safar davomida Buxoro zaminidagi yetti buyuk avliyo – pirlar haqida juda iliq va foydali fikrlarni bildirdi. Ularni dunyoga tanitish borasida barcha choralarni ko‘rish, ulug‘ ajdodlarimiz muqaddas maskanlarini olam ahliga tanitish haqida tavsiyalar berdi. Shuningdek, Prezidentimiz “Yetti pir” haqida kitoblar yozish, ularning asarlarini tarjima qilish kerakligi haqida ham kuyunib gapirdi.
Aynan ana shu ulug‘ allomalarimiz haqida ilmiy asoslangan, pishiq va puxta kitobni nashrga tayyorlash uchun filologiya fanlari nomzodi Sayfiddin Rafiddinov bir qancha izlanishlar olib borgan. Yaqinda adibning buxorolik yetti pir to‘g‘risidagi – “Dunyo murshidlari” deb nomlangan asari tayyor bo‘ldi.
“Faqat endi ushbu asarni nashr etish uchun mutasaddi yoki ko‘ngilli insonlarning yordami kerak”, deydi O‘zA bilan suhbatda yetti buyuk avliyo to‘g‘risida bir yil davomida izlanib kitob yozgan muallif Sayfiddin Rafiddinov.
– Bu yil mamlakatimizda Abdulxoliq G‘ijduvoniy tavalludining 915 yilligi va Bahouddin Naqshband tavalludining 700 yilligi keng nishonlanadi. Davlatimiz rahbari tashabbusi bilan mazkur sanalarga bag‘ishlab, Islom olamining yirik olimu ulamolari ishtirokida xalqaro anjuman o‘tkaziladi. Shu munosabat bilan O‘zbekiston musulmonlari idorasi tomonidan kaminaga “Yetti pir” haqida kitob yozish hamda ularning asarlarini tarjima qilish vazifasi topshirishgan edi.
Bir yil davomida Xojagon Naqshbandiya mashoyixlari bilan bog‘liq beshta kitob tayyorlandi. Kitoblar O‘zbekiston musulmonlari idorasi hamda Vazirlar Mahkamasi huzuridagi Diniy Qo‘mitaning ekspertlar guruhi tomonidan nashrga tavsiya qilindi. Ayrim masalalarda O‘zbekiston Fanlar akademiyasining O‘zbek tili, adabiyoti va folklori instituti olimlari bilan kengashib ish tutildi.
Beshta kitobning birinchisi, buxorolik yetti pir – Abdulxoliq G‘ijduvoniy, Xoja Orif Revgariy, Mahmud Anjir Fag‘naviy, Ali Romitaniy, Muhammad Bobo Sammosiy, Amir Kulol va Bahovuddin Naqshband haqida bo‘lib “Dunyo murshidlari” deya nomlandi. Kitobni yozishda arabiy va forsiy manbalardan, yetti pirning asarlaridan, xorijda va yurtimizda nashr etilgan manbalardan foydalanildi.
Qolgan kitoblar yetti pirning asarlari tarjimasidir. Ular: Yusuf Hamadoniyning “Rutbat ul-hayot”, “Odobi tariqat” va “Inson va koinot haqida”gi risolalari hamda ilova ma’lumotlar, Abdulxoliq G‘ijduvoniyning “Maqomoti Yusuf Hamadoniy”, “Vasiyatnoma” hamda ilova ma’lumotlar; Xoja Orif Revgariyning “Mahbub ul-orifin” risolasi va ilova ma’lumotlar; Kaminaning “Xojagon-Naqshbandiya tariqati” haqidagi rosolasini o‘z ichiga oladi.
Kitoblarning ilmiyligini hisobga olib, ayrimlarining oxiriga asarning qo‘lyozma matnini ham ilova qildik. Bu xorijlik kitobxonlarning foydalanishlari uchun ham qo‘l keladi.
Bo‘lajak xalqaro anjumanga to‘yona sifatida endi ularni tezroq nashr etish payidaman.
Beshak, avvalo, kitoblarni oxiriga yetkazishda kuch-quvvat va ilhom bergan Allohga beadad hamdu sanolar bo‘lsin! Tilagim – ushbu kitoblar tezroq, bexato va sifatli nashr etilsa. Buxoro viloyati hokimiyati yoki boshqa nufuzli tashkilotlar mazkur kitoblarga homiylik qilsa, yaxshi bo‘lardi.
Prezidentimiz yoshlarimizning ilmi va axloqi, kelajagi xususida kuyinib gapiryapti. Farzand tarbiyasida kitoblarning o‘rni nechog‘lik muhim ekanini bot-bot takrorlamoqda.
Mashoyixlarimiz haqidagi ushbu kitoblar, ularning asarlari yoshlarimizni ilmu ma’rifatga, odob-axloq, ota-ona va ustozlarni hurmat qilishga, dinimiz va e’tiqodimizni qadrlashga, elu yurt, jonajon Vatanni sevishga, targ‘ib va tashviq qilishi bilan ham e’tiborga molik, deb hisoblaymiz.
Iymon 
Namoz 
Ro'za 
Zakot 
Haj 
Qur'on 
Islom saboqlari 
Aloqa 
