O‘zbekiston Respublikasi Prezidenti “O‘zbekiston Respublikasining turizm sohasini jadal rivojlantirishni ta’minlash chora-tadbirlari to‘g‘risida”gi 2016 yil 2 dekabrdagi PF-4861-son farmoni, shuningdek, yurtimizda turizm sohasini rivojlantishga qaratilgan izchil sa’y-harakatlarga hamohang tarzda O‘zbekiston musulmonlari idorasi ham “ziyorat turizm” faoliyatini yo‘lga qo‘ydi.
Joriy yilning 23 fevral kuni O‘zbekiston musulmonlari idorasi huzuridagi Muqaddas qadamjolarni saqlash va obod etish xayriya jamoat fondiga O‘zbekiston Respublikasi Turizmni rivojlantirish davlat qo‘mitasi tomonidan turizm faoliyatini kirish, chiqish va ichki turizm yo‘nalishlarida amalga oshirish huquqini beruvchi T-0151-son maxsus litsenziyasi taqdim etildi.
Endilikda, O‘zbekiston musulmonlari idorasi huzuridagi Muqaddas qadamjolarni saqlash va obod etish xayriya jamoat fondi yurtimizdagi qadamjo, ziyoratgoh va masjidlarni ta’mirlash va obod etish bilan bir qatorda, bunday tabarruk maskanlarga mahalliy va xorijiy fuqarolarning keng ko‘lamdagi ziyoratlarini uyushtirish, ziyoratchilar uchun munosib shart-sharoitlar yaratish va musulmon dunyosidagi nufuzini yanada oshirishga ham xizmat qiladi.
Ma’lumot uchun, O‘zbekiston musulmonlari idorasi huzuridagi Muqaddas qadamjolarni saqlash va obod etish xayriya jamoat fondi O‘zbekiston Respublikasi Prezidentining 2008 yil 7 avgustdagi PQ 938 – sonli Qaroriga asosan tashkil etilgan. Fondning asosiy maqsadi muqaddas Islom dini, Islom falsafasi va madaniyati rivojiga ulkan hissa qo‘shgan buyuk ulamo va aziz avliyolarning tabarruk nomlari bilan bog‘liq Imom Buxoriy, Imom Termiziy, Imom Moturidiy, Hazrati Imom, Shohi Zinda, Abduxoliq G‘ijduvoniy, Bahouddin Naqshband, Xoja Ahror Valiy, Ko‘k gumbaz, Dorus-saodat, Qosim shayx kabi mamlakatimiz hududidagi qutlug‘ ziyoratgoh va qadamjolarni talab darajasida saqlash va obodonlashtirish, ularning infratuzilmasini takomillashtirish ishlarini amalga oshirishdan iborat.

Yuridik manzil: 100002, Toshkent shahar, Qorasaroy ko‘chasi, 47-uy.
Aloqa telefonlari: (+99871) 150-64-11, 240-17-69
Internet manzil: www.qadamjo.uz
e-pochta: info@qadamjo.uz

Ikromjon Axmedov

O‘MI Matbuot xizmati