Savol: Zuhd, haqiqiy zohidlik nima degani?

Javob: “Zuhd” biror narsadan yuz o‘girish ma’nosini anglatadi. Abu Idris Havoloniy zuhd haqida bunday deganlar: “Haqiqiy zohid halol narsani o‘ziga harom qilmaydi, dunyodan voz kechmaydi. Balki o‘z qo‘lidagidan ko‘ra, Alloh taoloning huzuridagiga ishonadi, yetgan biror musibat evaziga ajru savob umid qilib, yanada xotirjam bo‘ladi”.

Abu Sulaymon Dorimiy: “Biror kishining zohirini ko‘rib, zohid ekan, demagin. Chunki zuhd qalbda bo‘ladi”, deganlar. Hasan Basriy rahmatullohi alayh: “Zuhd kishi biror odamni ko‘rganida uni o‘zidan afzal bilishidir”, deganlar. Imom Ahmad rahmatullohi alayh: “Dunyo borasida zohidlik orzularning qisqaligi va odamlar qo‘lidagi narsalardan tama qilmaslik”, deganlar.

Demak, haqiqiy zuhd hamma narsadan yuz o‘girib yashash emas, balki mol-dunyoga muhabbat qo‘ymaslik, qo‘ldan ketganiga qayg‘urmay, yetgan aziyatga sabr bilan Alloh taolodan savob umid etish, erishgan yutuqlari uchun Alloh taologa hamd aytib, yana savob umid qilishdir.

“So‘ragan edingiz” kitobidan

O‘MI Matbuot xizmati