Sayt test holatida ishlamoqda!
29 Aprel, 2025   |   1 Zulqa`da, 1446

Toshkent shahri
Tong
03:55
Quyosh
05:23
Peshin
12:25
Asr
17:15
Shom
19:21
Xufton
20:44
Bismillah
29 Aprel, 2025, 1 Zulqa`da, 1446

Xushxabar: “Hidoyat”da bolalarga diniy saboq berila boshlandi

05.02.2018   6367   3 min.
Xushxabar: “Hidoyat”da bolalarga diniy saboq berila boshlandi

O‘zbekiston musulmonlari idorasining diniy-ma’rifiy nashri hisoblangan “Hidoyat” jurnalining 2018 yilning 1-sonidan boshlab “Bolalar sahifasi” rukni ostida bolalar uchun saboqlar berila boshlandi.

Bolalar uchun saboqlar ular tushunadigan lotin yozuvida berilmoqda. 

Quyida ushbu sahifada bolajonlar uchun berilgan birinchi saboq bilan tanishishingiz mumkin. 

Birinchi saboq: Tabarruk kalomlar

Assalomu alaykum, aziz nuridiydalar!

 Qani endi “Bismillahir rohmanir rohim” deb cho‘kka tushib o‘tiring-chi! Nega bunday deymiz, uning ma’nosini bilasizlarmi? Uning ma’nosi: “Mehribon va rahmli Alloh nomi bilan boshlayman” demakdir. Har bir musulmon farzandi nima ish qilsa ham, xoh dars o‘qisin yo biror ishni boshlayotgan bo‘lsin, uyga kirayotgan yoki dasturxonga o‘tirib ovqatlanayotgan bo‘lsin, xoh uyquga yotayotgan yoki kiyim kiyayotgan bo‘lsin, albatta, ana shu so‘zlarni aytishi kerak. “Bismilloh”siz boshlangan ish barakali bo‘lmaydi. Biz musulmonlar hatto “Bismilloh” aytilmay so‘yilgan hayvonning go‘shtini yemaymiz. 

Bundan tashqari, siz bilib olishingiz kerak bo‘lgan yana bir kalima bor. U bunday aytiladi: “A’uzu billahi minash shaytonir rojiym”. Ma’nosi: “Alloh dargohidan quvilgan shaytonning yovuzligidan panoh so‘rayman” degani. Qur’ondan bir oyat o‘qisangiz ham, albatta, oldin anashu kalimani aytish kerak. 

Qur’on o‘qish uchun tahorat qilish zarur. Tahorat qilish unchalik qiyin ish emas. Oldin qo‘llaringizni uch marta oshig‘i bilan yaxshilab yuvasiz, keyin og‘izni uch marta suv bilan chayqab, bosh va ko‘rsatkich barmoqlaringiz bilan tishlarni ishqaysiz, burunga uch bor suv tortib qoqasiz. Keyin yuzingizni, peshonadan iyak ostigacha va ikki quloq orasini uch marta yaxshilab yuvasiz. 

So‘ngra ikki qo‘l bilaklarini tirsaklar bilan qo‘shib yuvasiz, qo‘lingizni ho‘llab boshingizga, quloqlaringizga va bo‘yningizga (surasiz) mas'h qilasiz. Shundan so‘ng oyoqlarni to‘pig‘i bilan qo‘shib, panjalar orasiga barmoq tiqib yaxshilab yuvasiz. Bu amallarni qilish tartibini ota-onangizdan so‘rasangiz, sizlarga yaxshilab o‘rgatishadi.

 

Hozircha shular yetarli. Xayr, bolajonlar!

Ahmad Muhammad

tayyorladi

 

Siz o‘zingiz va farzandingiz uchun diniy-ma’rifiy yo‘nalishda bilimga ega bo‘lmoqchi bo‘lsangiz “Hidoyat” jurnalini kuzatib boring. 

Ushbu saboqlarni kuzatib borish va jurnalimizga obuna bo‘lishni istaganlar o‘zlari yashab turgan hududdagi masjidga murojaat qilishlari mumkin.

Ma’lumot uchun, “Islom nuri” gazetasi va “Hidoyat” jurnali O‘zbekiston musulmonlari idorasining diniy-ma’rifiy nashrlari hisoblanadi. Bir yillik obuna narxi “Islom nuri” gazetasi uchun 36 ming so‘m va “Hidoyat” jurnali uchun esa 45 ming so‘mni tashkil etadi.

O‘MI Matbuot xizmati

O'zbekiston yangiliklari
Boshqa maqolalar
Yangiliklar

Indoneziya din ishlari vaziri: Samarqand shahri Makka va Madinaga olib boruvchi asosiy darvoza

29.04.2025   410   3 min.
Indoneziya din ishlari vaziri: Samarqand shahri Makka va Madinaga olib boruvchi asosiy darvoza

Indoneziya poytaxtida O‘zbekiston turizm salohiyatining taqdimoti o‘tkazildi, deb xabar qilmoqda "Dunyo" AA muxbiri. 
 

Tadbirda Indoneziya sayyohlik kompaniyalari rahbarlari, Turizm va Din ishlari vazirliklari mas’ul xodimlari hamda matbuot vakillari ishtirok etdi.

 

"Qanot Sharq" aviakompaniyasi rahbariyati joriy yilning kuzgi mavsumidan boshlab Jakarta-Samarqand-Jidda yo‘nalishida havo qatnovlari yo‘lga qo‘yilishini e’lon qildi. Samarqand shahri va "Umra+" dasturi doirasida indoneziyalik sayyohlar uchun yaratilgan imkoniyatlar haqidagi videofilm namoyish etildi.   

 

Anjumanda so‘zga chiqqan Indoneziya din ishlari vaziri Nasiruddin Umar O‘zbekistonning islom sivilizatsiyasi rivojiga qo‘shgan hissasi, ushbu zamindan yetishib chiqqan buyuk zotlar, mutafakkir va ulamolar to‘g‘risida so‘zlab berdi.

 

–O‘zbekiston – muqaddas zamin. Samarqand shahri esa Makka va Madinaga olib boruvchi asosiy darvoza, – dedi vazir Nasiruddin Umar. – Movarounnahr ulamolari Indoneziya orollarida islom dini ta’limotini qaror toptirishda alohida o‘rin tutadi. Islom olamining buyuk dahosi, Qur’ondan keyingi o‘rinda turuvchi "Al Jomiy as-Sahihi" kitobining muallifi Imom Buxoriy O‘zbekiston zaminida tavallud topgan. O‘zbekiston Prezidentining farmoni bilan taniqli muhaddisning qabri joylashgan Samarqand yonidagi Xartang qishlog‘ida ulug‘vor yodgorlik majmuasi barpo etilmoqda. Ziyoratgoh dunyo musulmonlari uchun eng ahamiyatli tuhfa bo‘lishi muqarrar. Shubhasiz, ushbu voqea nafaqat Yangi O‘zbekiston tarixida balki islom dini rivojlanishi tarixida ham munosib o‘rin egallaydi.

 

Imom Buxoriy indoneziyaliklar uchun nihoyatda qadrli shaxs. Uning maqbarasini ziyorat qilish har bir musulmonning orzusi. Mamlakatimiz birinchi Prezidenti Sukarno ham bundan 70 yil muqaddam ya’ni 1956 yilda muhaddisning qabrini ziyorat qilgan.

 

Har yili 1 million 200 mingdan ortiq vatandoshimiz Umra amallarini ado etish uchun Saudiya Arabistoniga yo‘l oladi. Ziyoratchilarimiz aksariyat hollarda Istambul, Qohira, Doha, Ammon shaharlarida to‘xtab o‘tishadi. Samarqand shahri o‘zining boy tarixi, yuksak madaniyati, islomiy obidalari, tamaddun maskanlari, o‘zbeklarga xos mehmondo‘stlik qadriyatlari, aholisining indoneziyaliklarga bo‘lgan iliq munosabati nuqtayi nazaridan qayd etilgan shaharlardan ko‘p marotaba afzaldir.  

 

Indoneziya tomoni, shuningdek, "Umra+Samarqand" dasturini ommalashtirishda har tomonlama ko‘mak ko‘rsatishga tayyorligini bildirib, bugungi nutqi o‘zining ijtimoiy tarmoqlardagi akkauntlarida joylashtirilishi va keng jamoatchilikka yetkazilishini urg‘uladi.

 

Shuningdek, targ‘ibot va tashviqot qilish orqali "Umra+Samarqand" turpaketini ommalashtirish va Indoneziyadan O‘zbekistonga turistlar sonini keskin oshirish imkoniyati mavjud ekanligini ta’kidlandi.

 

Tadbir doirasida "Qanot Sharq" aviakompaniyasi vakillari va Indoneziyaning "ASITA" turizm agentliklari tashkiloti raisi Rusmiati Nunung o‘rtasida Jakarta - Samarqand - Jidda yo‘nalishida aviaqatnovlarni yo‘lga qo‘yish va indoneziyalik turistlarga xizmat ko‘rsatish to‘g‘risida hamkorlik memorandumi imzolandi.  

 

O'zbekiston yangiliklari