Kecha Namanganda boshlangan qorilar musobaqasi sabab butun viloyatni, qolaversa, diyorimizning barcha hududini ilohiy fayz‑futuh chulg‘ab oldi, bayramlar va xursandchiliklar aslo to‘xtamayapti, zinhor to‘xtamasin ham. Hatto dam olish kunlari ham odamlarimiz Qur’onga oshno bo‘lishdi, uning fayzidan orom olishdi.
Mana shunday shodiyona kunlar bugun ham Namangandan o‘z ziyosini taratishda davom etadi. Barcha-barchani Qur’onga bo‘lgan muhabbatini yanada sayqallashga da’vat etamiz.
Ma’lumki, qalb bir narsaga muhabbat qilsa, unga bog‘lanib qoladi, unga mushtoq bo‘ladi, unga qattiq qiziqadi. Agar qalb Qur’onga muhabbat qilsa, uning qiroatidan lazzatlanadi, unga bor e’tiborini qaratadi va buning natijasida chuqur tushunishu tadabbur hosil bo‘ladi. Aksincha, agar muhabbat bo‘lmasa, qalbning Qur’onga yuzlanishi qiyin bo‘ladi. Qur’onga tomon burilish faqatgina nafsini qattiq tergash, o‘zini majburlash orqali juda ham og‘ir kechadi. Qur’on muhabbatining hosil bo‘lishi tadabburning eng kuchli va oliy darajada kechishiga sabab bo‘ladi.
Do‘stu birodarlarimiz, hammamizni ikki dunyo saodatiga yetaklovchi, hidoyat manbai Qur’onga bo‘lgan muhabbatimizni ziyodalashtiraylik, saralash bosqichiga sanoqli kunlar qolgan qorilar musobaqasini diqqat bilan kuzataylik, bir necha kundan keyin bunday shukuhni izlab ham topib bo‘lmaydi.
Shunday ekan azizlar, bizning muslim.uz portali va ijtimoiy tarmoqlarni kuzatib boring. Barchamizga Yaratganning rahmati bo‘lsin.
O‘zbekiston musulmonlari idorasi Matbuot xizmati
Zuhd – dunyoga bemayl, behavas bo‘lishlik, nafsini tiyishlik, taqvodorlik demakdir. Shunday ekan o‘z-o‘zidan savol tug‘iladi: badavlat odam ham zohid bo‘ladimi?
Sufyoni Savriy rahimahulloh hazratlaridan: “Badavlat odam ham zohid bo‘ladimi?” deb so‘ralganida, u zot: “Ha! Agar mol-dunyosi ko‘payganida shukr qilsa, kamayganida ham shukr, ham sabr qilsa”, deb javob bergan ekanlar.
Aliy roziyallohu anhu: “Agarda bir kishi yer yuzidagi hamma narsani qo‘lga kiritib, u orqali Allohning rizosini ko‘zlasa, demak, u zohiddir! Agar u hamma narsani tashlasa-yu, bundan Allohning roziligini maqsad qilmasa, demak, u zohid emasdir”, deganlar.
Podshoh zohidning oldiga borib: “Sening o‘ta zohidligingni bilib, oldingga keldim”, debdi. Zohid esa: “O‘zimdan-da zuhdda mahkamroq kishiga yo‘llab qo‘yaymi seni?” debdi. “Mayli”, debdi podshoh. Zohid esa: “Bu sensan... Chunki men bu o‘tkinchi dunyodan yuz o‘girdim. Sen bo‘lsang boqiy jannatga orqa o‘girgansan (ya’ni, haqiqiy yuz o‘giruvchi sensan)”, debdi.
Mol-dunyoni ko‘paytirish yoki vaqtinchalik lazzat uchun abadiy jannatdan voz kechish mumkinmi?!
Alloh taolo aytadi: «Ayting: “Albatta, namozim, ibodatim va hayotu mamotim olamlar Parvardigori bo‘lmish Alloh uchundir”»[1].
Xalifa Hishom ibn Abdulmalik Solim ibn Abdullohni ka’baning oldida ko‘rib: “Mendan birorta hojatingizni so‘rang”, dedi.
U zot javoban: “Allohga qasamki, men Allohning uyida turib Allohdan boshqadan so‘rashdan hayo qilaman”, dedi. Baytullohdan chiqqanidan so‘ng Hishom ibn Abdulmalik: “Allohning uyidan ham chiqdingiz, endi so‘rang!” – dedi. “Dunyo hojatlaridanmi yoki oxiratmi?” – dedi Ibn Abdulloh. Hishom ibn Abdulmalik: “Dunyo hojatlaridan”, dedi. Shunda Ibn Abdulloh: “Dunyoga molik bo‘lgan Zotdan so‘ramadim-u, qanday qilib egasi bo‘lmagandan so‘rayman”, degan ekan.
Bir solih zotga: “Dunyodan yuz o‘girib, go‘sht, tuxum va lazzatli taomlarni tark etgan kishi haqida nima deysiz?” – deb savol berishdi. U: “Zuhd bilan lazzatli narsalardan voz kechishning bir-biriga nima aloqasi bor?! Xohlagan narsasini yeyaversin va Allohga haqiqiy taqvo qilsin”, dedi.
Agar haromdan hazar qilib, haloldan yesangiz, Alloh buni yomon ko‘rmaydi. Alloh harom qilgan narsalardan chetlanib, lazzatli narsalarni yeyayotgan bo‘lsangiz, buning ham karohiyatli joyi yo‘q.
Ota-onangizga yaxshilik qilayapsizmi?!
Yaqin qarindoshlaringiz, qo‘ni-qo‘shnilaringiz bilan munosabatlaringiz qanday?!
Qiynalganlarga yordam beryapsizmi?!
Achchig‘ingiz chiqqanda g‘azabingizni yenga olayapsizmi?!
Sizga yomonlik qilganlarga ham yaxshilik qilish qo‘lingizdan kelyaptimi?!
Kamiga sabr qilib, ko‘piga shukr qilyapsizmi?!
Mana shu savollarga to‘liq javob bera olsangiz, bilingizki siz Allohning roziligiga erishasiz.
Hasson Shamsiy Poshoning
“Jannat bo‘stonidagi oilaviy oqshomlar” nomli kitobidan
G‘iyosiddin Habibulloh, Ilhom Ohund, Abdulbosit Abdulvohid tarjimasi.
[1] An’om surasi, 162-oyat.