Namanganda bugun hayit bayramimi yo juma ayyomi?
Allohning kalomidan bir soniya ham uzoqlashishni istamagan oshiq do‘stlarimizga, ilohiy rahmat yog‘ilsin deymiz. Bugun erta tongdan vodiyning eng go‘zal zamini bo‘lgan Namangan viloyati uzra Yaratgan Parvardigorning barakoti va nurlari yog‘ildi, desak ayni haq gapni aytgan bo‘lamiz.
Chunki, guvoh bo‘layotganimizdek, yoshu qari, erkagu ayol, xullas, barcha Qur’onga muhabbatli Namangan ahli erta saxardan viloyatdagi qorilar musobaqasi o‘tadigan jome masjilarga yuzlanishdi.
Shu kunga qadar hududlarda o‘tayotgan musobaqalarni tilimizga kelgan eng go‘zal so‘zlar bilan ta’riflashga urindik. Lekin Namanganda bo‘layotgan musobaqa shukuhini va mo‘min-musulmonlar kayfiyatini ifodalashga hayratlanganimizdan umuman so‘z topa olmadik. Shuning uchun buni onlayn tasvirlar, fotolavhalar va imkon bo‘lsa o‘zingiz bevosita ishtirok etib his qilishingizni tavsiya etamiz.
Rivoyat qilinishicha, Sufyon ibn Uyayna rahmatullohi alayh: “Ilm olish tinglashdan boshlanadi, so‘ngra uni tushuniladi va yod olinadi keyin unga amal qilinadi”, dedilar. Banda Kalomullohni xolis niyat bilan tinglasa, uning qalbiga Alloh taolo nur soladi va to‘g‘ri yo‘lga hidoyat qiladi. Qur’oni karimda marhamat qilinadi: “…Bas, (ey Muhammad!) Mening shunday bandalarimga xushxabar beringki, ular gapni tinglab, so‘ng uning eng go‘zaliga (foydalisiga) ergashadilar. Aynan o‘shalar Alloh hidoyat etgan zotlardir va aynan o‘shalargina aql egalaridir” (Zumar, 17-18).
Demak, inson ibodat niyatida Kalomullohni tinglasa va jim tursa cheksiz ajru mukofotga ega bo‘ladi. Qur’oni karimni eshituvchi, avvalo, qalbini hozirlaydi, ibodatni niyat qiladi, siyratiyu suratida xotirjam bo‘lib, ixlos bilan Allohning kalomiga some’ bo‘ladi. Mana shundagina o‘zi umid qilgan va bunga va’da qilingan ajrlarga erishadi, inshoalloh.
Shunday ekan azizlar, fursatni boy bermang, so‘z va qalam bilan ifoda qilib bo‘lmaydigan onlarni o‘tkazib yuborman, imkon bo‘lsa borib, bo‘lmasa bizning muslim.uz portali va ijtimoiy tarmoqlarni kuzatib, zavq oling. Barchamizdan Alloh rozi bo‘lsin.
O‘zbekiston musulmonlari idorasi Matbuot xizmati
Iordaniya OAV: Toshkentda Islom sivilizatsiyasiga bag‘ishlangan xalqaro mediaforum o‘tkaziladi
Iordaniyaning nufuzli “Jordan News Agency” (Petra) axborot agentligi hamda “Hala Ahbar” nashrida 24–29 avgust kunlari Toshkent shahrida bo‘lib o‘tadigan “Islom sivilizatsiyasi: yangi nigoh va kashfiyotlar” mavzusidagi xalqaro mediaforumga bag‘ishlangan maqolalar e’lon qilindi, deb xabar bermoqda “Dunyo” AA.
Agentlikda yozilishicha, mazkur yirik xalqaro tadbir O‘zbekistonning jahon media hamjamiyati bilan aloqalarini yanada kengaytirish, jurnalistlar va soha mutaxassislari o‘rtasida tajriba almashishni rivojlantirishi bilan ahamiyatlidir.
Shu bilan birga, forum davomida islom sivilizatsiyasining boy ilmiy-ma’rifiy va madaniy merosini zamonaviy media vositalari orqali keng targ‘ib etishga alohida e’tibor qaratiladi.
Forumning asosiy tadbirlari O‘zbekistondagi Islom sivilizatsiyasi markazida o‘tkaziladi. Unda xorijiy ommaviy axborot vositalari vakillari, xalqaro ekspertlar hamda media sohasi mutaxassislari ishtirok etadi.
Nashrlar forum dasturining mazmun-mohiyatiga alohida e’tibor qaratgan. Xususan, tadbir doirasida yalpi majlislar, ixtisoslashtirilgan media-ko‘rgazmalar, matbuot brifinglari va ikki tomonlama uchrashuvlar tashkil etiladi.
Munozaralarda hujjatli filmlar yaratish, tarixiy xotirani asrash va yoritish, nashriyot loyihalarini rivojlantirish, zamonaviy texnologiyalardan media sohasida samarali foydalanish hamda xalqaro media loyihalarni amalga oshirish istiqbollari muhokama qilinadi.
Nashrning qayd etishicha, tadbirning muhim jihatlaridan biri – O‘zbekistonlik talabalar uchun xalqaro media sohasining tajribali mutaxassislari ishtirokida amaliy master-klasslar o‘tkazilishidir. Bu mashg‘ulotlar zamonaviy jurnalistika, mediamahsulotlar yaratish va xalqaro axborot makonida samarali faoliyat yuritish bo‘yicha bilim va ko‘nikmalarni oshirishga xizmat qiladi.
Iordaniya OAVda forum doirasida ishtirokchilar uchun Samarqand shahriga safar ham rejalashtirilgani qayd etilgan. Xorijiy jurnalistlar Imom Buxoriy majmuasini ziyorat qilib, Samarqandning boy tarixiy-madaniy merosi bilan tanishadilar. Toshkent shahrida esa xalqaro OAV vakillari uchun maxsus mediatur tashkil etiladi.
Bunday safarlar forum ishtirokchilariga O‘zbekistonning nafaqat zamonaviy taraqqiyoti, balki uning jahon sivilizatsiyasi tarixidagi o‘rni, ilmiy-ma’rifiy an’analari va boy madaniy merosi haqida bevosita tasavvur hosil qilish imkonini beradi.
Maqolalarda xalqaro mediaforumning 28 avgust kuni yakuniy yalpi majlis va rasmiy yopilish marosimi bilan yakunlanishi ham ma’lum qilingan. Xorijiy mehmonlar O‘zbekiston Respublikasi davlat mustaqilligining 35 yilligiga bag‘ishlangan tadbirlarda ham ishtirok etadi.
O‘zbekiston musulmonlar idorasi Matbuot xizmati
