Namanganda bugun hayit bayramimi yo juma ayyomi?
Allohning kalomidan bir soniya ham uzoqlashishni istamagan oshiq do‘stlarimizga, ilohiy rahmat yog‘ilsin deymiz. Bugun erta tongdan vodiyning eng go‘zal zamini bo‘lgan Namangan viloyati uzra Yaratgan Parvardigorning barakoti va nurlari yog‘ildi, desak ayni haq gapni aytgan bo‘lamiz.
Chunki, guvoh bo‘layotganimizdek, yoshu qari, erkagu ayol, xullas, barcha Qur’onga muhabbatli Namangan ahli erta saxardan viloyatdagi qorilar musobaqasi o‘tadigan jome masjilarga yuzlanishdi.
Shu kunga qadar hududlarda o‘tayotgan musobaqalarni tilimizga kelgan eng go‘zal so‘zlar bilan ta’riflashga urindik. Lekin Namanganda bo‘layotgan musobaqa shukuhini va mo‘min-musulmonlar kayfiyatini ifodalashga hayratlanganimizdan umuman so‘z topa olmadik. Shuning uchun buni onlayn tasvirlar, fotolavhalar va imkon bo‘lsa o‘zingiz bevosita ishtirok etib his qilishingizni tavsiya etamiz.
Rivoyat qilinishicha, Sufyon ibn Uyayna rahmatullohi alayh: “Ilm olish tinglashdan boshlanadi, so‘ngra uni tushuniladi va yod olinadi keyin unga amal qilinadi”, dedilar. Banda Kalomullohni xolis niyat bilan tinglasa, uning qalbiga Alloh taolo nur soladi va to‘g‘ri yo‘lga hidoyat qiladi. Qur’oni karimda marhamat qilinadi: “…Bas, (ey Muhammad!) Mening shunday bandalarimga xushxabar beringki, ular gapni tinglab, so‘ng uning eng go‘zaliga (foydalisiga) ergashadilar. Aynan o‘shalar Alloh hidoyat etgan zotlardir va aynan o‘shalargina aql egalaridir” (Zumar, 17-18).
Demak, inson ibodat niyatida Kalomullohni tinglasa va jim tursa cheksiz ajru mukofotga ega bo‘ladi. Qur’oni karimni eshituvchi, avvalo, qalbini hozirlaydi, ibodatni niyat qiladi, siyratiyu suratida xotirjam bo‘lib, ixlos bilan Allohning kalomiga some’ bo‘ladi. Mana shundagina o‘zi umid qilgan va bunga va’da qilingan ajrlarga erishadi, inshoalloh.
Shunday ekan azizlar, fursatni boy bermang, so‘z va qalam bilan ifoda qilib bo‘lmaydigan onlarni o‘tkazib yuborman, imkon bo‘lsa borib, bo‘lmasa bizning muslim.uz portali va ijtimoiy tarmoqlarni kuzatib, zavq oling. Barchamizdan Alloh rozi bo‘lsin.
O‘zbekiston musulmonlari idorasi Matbuot xizmati
Murojaatlarga amaliy yechim topilmoqda
Bugun, 2 sentyabr chorshanba kuni O‘zbekiston musulmonlari idorasi raisi o‘rinbosari Muhammadolim domla Muhammadsiddiqov navbatdagi fuqarolar qabulini o‘tkazib, yurtdoshlarimizning murojaat va takliflarini atroflicha tingladi.
Ochiq va samimiy ruhda kechgan qabul jarayonida Toshkent shahri, Namangan, Farg‘ona, Andijon, Toshkent va Qashqadaryo viloyatlaridan tashrif buyurgan fuqarolarning diniy ta’lim muassasalariga o‘qishga kirish, Umra ziyorati tartibi hamda masjidlar faoliyatiga doir murojaatlari birma-bir ko‘rib chiqildi.
Uchrashuv davomida bildirilgan masalalar yuzasidan fuqarolarga shar’iy va huquqiy tushuntirishlar berilib, tegishli mas’ul xodimlarga murojaatlarni qisqa fursatlarda qonuniy hamda ijobiy hal etish bo‘yicha aniq topshiriqlar yuklatildi.
Eslatib o‘tamiz, aholi bilan ochiq muloqotni ta’minlashga qaratilgan bu kabi fuqarolar qabullari O‘zbekiston musulmonlari idorasi, uning hududiy vakilliklari hamda yurtimizdagi barcha jome masjidlarida har haftaning chorshanba kuni muntazam ravishda o‘tkazib kelinmoqda.
O‘zbekiston musulmonlari idorasi
Matbuot xizmati
