Sayt test holatida ishlamoqda!
16 May, 2025   |   18 Zulqa`da, 1446

Toshkent shahri
Tong
03:28
Quyosh
05:04
Peshin
12:24
Asr
17:25
Shom
19:39
Xufton
21:08
Bismillah
16 May, 2025, 18 Zulqa`da, 1446

Muftiy hazratlarining hamdardliklari musibat egalariga yetkazildi

24.01.2018   4929   2 min.
Muftiy hazratlarining  hamdardliklari musibat egalariga yetkazildi

Shu kunlarda ulamolar va imom-domlalar tomonidan Qozog‘istondagi fojiada halok bo‘lganlarning oila a’zolariga hamdardlik bildirish, xatmi Qur’on o‘qib, ruhi poklariga baxshida qilish ishlari davom etmoqda.
Prezidentimiz Hakim Termiziy maqbarasi ziyorati chog‘ida halok bo‘lgan 52 o‘zbekistonlikning o‘limidan chuqur qayg‘uda ekanlarini aytib, ularning yaqinlariga ta’ziya bildirdilar. Mana shunday tabarruk qadamjoda Qur’on oyatlaridan o‘qilib, muftiy hazratlari tomonlaridan halok bo‘lgan yigitlar haqiga duolar qilindi.
Shu kunning o‘zida Shayx Abdulaziz Mansur motamsaro xonadonlarga tashrif buyurib, Yurtboshimizning hamdardligini yetkazishdi. Masjidlarda halok bo‘lganlar yaqinlariga ta’ziyalar izhor qilindi. Toshkent, Andijon viloyatlari imom-xatiblari mana shunday tasalli berish ishlarini davom ettirishdi.
Kuni kecha halokat qurbonlariga janoza namozi o‘qilib, dafn etildi. Ushbu marosimda aholi bilan bir qatorda viloyat va tumanlar rahbariyati, keng jamoatchik vakillari ham ishtirok etib, halok bo‘lgan yigitlar haqiga duoi fotiha qildilar. Marhumlarning ota-onasi va boshqa yaqinlariga sabr-bardosh tilandi.
Bugun, 24 yanvar kuni diniy idora masjidlar bo‘limi mudiri Rahimberdi Rahmonov va muhtasiblik bo‘limi Islomiddin Zuhriddinov boshchiligidagi ulamolar Namangan viloyatidagi musibat egalariga muftiy Usmonxon Alimov hazratlarining hamdardliklarini yetkazishdi. Shuningdek, ularga moddiy-ma’naviy ko‘mak qilib, ruhiy tasalli berishdi.
Shu o‘rinda ibratli rivoyatni keltirishni lozim topdik. Abu Sinondan qilingan rivoyatda u aytadi: “Farzandim Sinon vafot etdi. Uni dafn etib, qabrdan chiqmoqchi edim, qo‘limdan Abu Talha Havloniy tortib chiqardi va: “Senga xushxabar aytaymi?” – dedi. Albatta, dedim. “Abu Muso (roziyallohu anhu) Rasululloh (sollallohu alayhi va sallam)dan rivoyat qilishicha, Alloh taolo o‘lim farishtasidan: “Bandamning farzandini qabz qildingmi? Uning ko‘z quvonchi, qalb mevasining jonini oldingmi?” – deb so‘raydi. “Ha”, deb javob beradi farishta. “Bandam nima dedi?” – so‘raydi Alloh O‘zi bilgani holda. “U senga hamd aytdi va istirjo’ keltirdi”, javob beradi o‘lim farishtasi. Shunda Alloh aytadi: “Unga jannatda bir uy barpo qiling va uni “Hamd uyi” deb nomlang!”
Demak, Alloh taolo har qanday holatda chiroyli sabr qilguvchi mo‘min bandalar qatorida bo‘lmoqlikni barchamizga nasib etsin.

O‘zbekiston musulmonlari idorasi Matbuot xizmati

O'zbekiston yangiliklari
Boshqa maqolalar

Muborak safar boshlandi

14.05.2025   3550   3 min.
Muborak safar boshlandi

O‘zbekiston taraqqiyotining yangi davrida diniy-ma’rifiy soha rivojiga alohida e’tibor qaratilmoqda. Ayniqsa, haj va umra tadbirlarini tashkil etish va o‘tkazish yangi bosqichga ko‘tarildi. 2016 yilda 5 ming 200 nafar vatandoshimiz haj amallarini bajargan bo‘lsa, 2024 yilda 15 mingdan ortiq mo‘min-musulmonlar hojilik sharafiga muyassar bo‘ldi.
 

Bu yil ham 15 mingdan ziyod yurtdoshlarimiz haj ibodatini ado etishadi. Mamlakatimizning 9 ta hududiy aeroportidan ziyoratchilar har kuni to‘g‘ridan to‘g‘ri Madina shahriga haj safariga yuboriladi. Parvozlar “Uzbekistan Airways” aviakompaniyasi bilan birgalikda Saudiya Arabistonining “FlyNas” va “FlyAdeal” aviakompaniyalari tomonidan amalga oshiriladi.


Yurtdoshlarimizga Madinai munavvarada hamda Makkai mukarramada barcha shart-sharoitni yaratish maqsadida O‘zbekiston Respublikasi Din ishlari bo‘yicha qo‘mitasi hamda O‘zbekiston musulmonlari idorasi xodimlaridan iborat dastlabki ishchi guruh faol ish olib bordi.
 

Madina shahrida muhtasham besh yulduzli “Zam-zam Pullman” mehmonxonasi, Makkai mukarramada “Marmara hotel”, “Romance hotel”, “Al-Ayyam elite”, “Concrete hotel”, “Abroj Dania”, “Paradise”, “Open hotel”, “Ayyed saha” kabi sakkizta mehmonxona hojilarni yuqori saviyada kutib olishga shay qilingan. Mehmonxonalarda ziyoratchilar uchun namozxonalar, oshxonalar, tibbiyot punktlari hamda boshqa zarur vositalar hozirlandi.


13 may kuni tongda muborak haj safarini niyat qilgan ziyoratchilarning dastlabki guruhi dilda quvonch, tilda shukronalik bilan muqaddas zamin sari yo‘lga chiqdi.


Bo‘lg‘usi hojilarni kuzatish uchun Din ishlari bo‘yicha qo‘mita raisi Sodiq Toshboyev, O‘zbekiston musulmonlari idorasi raisi, muftiy Shayx Nuriddin Xoliqnazar, shuningdek, mutasaddi tashkilotlar mas’ullari va ommaviy axborot vositalari vakillari Toshkent xalqaro aeroportida jam bo‘ldi.


Orzulari ro‘yobidan his-hayajonga to‘lgan “Haj — 2025” mavsumining ilk ziyoratchilari aeroportdan Saudiya Arabistoniga jo‘nab ketdi.


Shu kuni Madina shahriga eson-omon yetib kelgan ziyoratchilar “Haj — 2025” ishchi guruhi va mutasaddilar tomonidan tantanali kutib olindi.


Yurtdoshlarimizga muhtasham “Zam-zam Pullman” mehmonxonasiga kirishlari bilanoq zam-zam suvlari, xurmo, shirinliklar va hadyalar ulashilib, izzat-ikrom ko‘rsatildi. Vatandoshlarimiz shodlik va shukronalik tuyg‘ulari bilan ziyorat va ibodatlarni ado etishga kirishdi.


Ayniqsa, mehmonxonaning Masjidi Nabaviyga juda yaqin masofada joylashgani hojilarimizni behad mamnun qilmoqda. Ular kunlik barcha ibodatni ushbu muborak masjidda ado etmoqda. Ular o‘z duolarida Yaratgandan yurtimizga tinchlik-osoyishtalik, xalqimizga bundan-da farovonlik so‘rashmoqda.


Eslatib o‘tamiz, ziyoratchilarimiz 2025 yil 13 maydan 28 mayga qadar haj safariga kuzatiladi.


«Xalq so‘zi».