O‘zbekiston Respublikasi Konstitutsiyasi qabul qilinganining 25 yilligi arafasida mamlakatimiz Prezidenti Shavkat Mirziyoyev 2 ming 700 nafar sudlanganlarni afv etish to‘g‘risidagi farmonni imzolagan edi.
Afv etish to‘g‘risidagi hujjatga muvofiq sudlanganlar tez orada oilasi bag‘riga qaytarildi va mamlakatimizda amalga oshirilayotgan islohotlarning faol ishtirokchisiga aylanishi uchun jamiyatga qaytish imkoni berildi.
Avf etilgan fuqarolar va ichki ishlar idoralarining maxsus ro‘yxatida turgan shaxslar bilan ishlash tizimi yaratilib, ular turli jamoat tadbirlariga jalb etilmoqda.
Shunday tadbirlardan biri 2018 yil 21 yanvar kuni Toshkent shahrining Mirobod tumani hokimligi va bosh imom-xatibi tashabbusi bilan tashkil etildi.
Adashib turli oqimlarga kirib qolgan, bugungi kunda ro‘yxatdan o‘chirilgan 23 nafar mirobodlik fuqarolar uchun tuman bosh imomi O.Xolmurodov taklifiga ko‘ra va tuman hokimining buyrug‘iga asosan Samarqand shahriga ziyorat sayohati uyushtirildi.
Tuman hokimiyati tomonidan ziyoratchilar uchun maxsus avtobus tashkillashtirilib, tushlik, borish-kelish xarajatlari hokimiyat tomonidan qoplandi.
Ziyoratchilar Imom Al-Buxoriy majmuasi, Shohi Zinda, Go‘ri Amir va Doniyor payg‘ambar ziyoratgohlarida bo‘lishdi. Safarda tuman ichki ishlar bo‘limi xodimlari va imom-xatib noiblari ham ishtirok etishdi.

O‘MI Matbuot xizmati