18-yanvar kuni Qozog‘iston Respublikasining Akto‘be viloyatida sodir bo‘lgan fojea haligacha ko‘z o‘ngimizdan ketmayapti. Qanchadan-qancha vatandoshimiz, dindoshimiz olov ichra bu foniy dunyodan boqiy dunyoga rixlat qildilar. Biz bir-birlarimiz bilan bir tanu bir jonmiz. Biror bir do‘stimizga, birodarimizga, dindoshimizga zarracha tikon kirsa bizga kirgandek bo‘ladi. Shuning uchun ham bugun butun O‘zbekiston xalqi juda katta qayg‘uda, iztirobda turibdi. Mana shunday qayg‘u va iztirobli kunlarda bir-birlarimizning holimizdan xabar olish esa eng go‘zal fazilatlaridan hisoblanadi.

Shuning uchun ham Andijon viloyatining barcha masjidlarida Akto‘bedagi fojea qurbonlari esga olindi, ularning haqlariga Qur’oni karim tilovatlari qilinib, duolari bag‘ishlandi.

Kecha esa Andijon viloyati bosh imom-xatibi Nuriddin hoji Xoliqnazarov va bir guruh imom-xatiblarimiz Akto‘bedagi fojea qurbonlarining xonadon ahllariga ta’ziya izhor qilish, ularga hamdardlik bildirish maqsadida Qorasuv shahri va Namangan viloyatining To‘raqo‘rg‘on, Kosonsoy tumanlaridagi xonadonlariga bordilar.

Mash’um fojeada halok bo‘lganlarning haqlariga Qur’on tilovati va duolar qilish, mag‘firat so‘rash va yaqinlariga tasalli berish barchamizning insoniylik burchimizdir. Inson qachon, qayerda va qanday holatda vafot etishini bilmaydi. Dinimizda biror fojea bilan vafot etgan mo‘minning darajasi yuqori bo‘lishi aytilgan. Payg‘ambarimiz sollallohu alayhi vasallam hadislarining birida Kishi suvga g‘arq bo‘lib, o‘tda kuyib, tom ostida qolib, ayol kishi tulg‘oq chog‘ida vafot etsa, shahidlik maqomini topishini aytganlar.

Dinimizda o‘tganlarni eslash, ularga duoyi xayrlar qilish mo‘minlik haqlaridan hisoblanadi. Qur’oni karimda shunday deyilgan:

“Ulardan keyin (dunyoga) kelgan zotlar ayturlar: “Ey Rabbimiz! O‘zing bizlarni va bizdan ilgari imon bilan o‘tganlarni mag‘firat etgin va qalblarimizda imon keltirgan zotlarga nisbatan gina paydo qilmagin! Ey Rabbimiz! Albatta, Sen mehribon va rahmli zotdirsan!” (Hashr surasi, 10-oyat)

Shunday ekan, ushbu fojeada vafot etgan yurtdoshlarimizning haqlariga duo qilib, Yaratgan Parvardigordan ularning solih amallarini o‘zlariga hamroh qilishini, gunohlarini mag‘firat etishini, yotgan joylarini jannat bog‘laridan bir bog‘ qilishini iltijo qilib so‘raymiz. Ularning oila a’zolari va yaqinlarining musibatlariga sherik ekanimizni bildirgan holda sabru jamil tilaymiz.

O‘MI Matbuot xizmati