Odamlar, ho odamlar!
Bog‘da bitgan bodomlar.
Eshitmadim, -demanglar,
Keldi havasli damlar.

Shahrimiz G‘ijduvonda,
Shul Xojai Jahonda,
Bellashurlar qorilar,
Sinov – ilmi Qur’onda.

Mujavvidmi, murattab,
Har biri bizga maktab.
Besh tuman vakiliga
Bugun dastlabki etap.

Tinglaymiz barin bir-bir,
Kim bilimdon, kim abjir.
Qiroat kimda go‘zal,
Kimda xos tajvid, tafsir.

Kurash bo‘lar basma-bas,
O‘ngimiz bu, - tush emas.
Maydonga yetaklagan,
Haqq Kalomiga havas.

Saralanar g‘oliblar,
Qori, ilm toliblar,
Viloyatga yo‘l olar,
Peshvolikka xotiblar.

Oqqan daryo, - oqadi,
Omad kimga boqadi.
Mo‘minlar ko‘z oldida,-
G‘oliblar toj toqadi.

Barchasiga tasanno!
Mag‘lublikda yo‘q ma’no.
Ajrda barcha tengdur,
Asosiy hakam – Mavlo.

Kim bu kun tashabbuskor,
Homiy, yo yalovbardor,
Rahmat ila siylasin,
Buyuk Zot Parvardigor!

Minglab qorilarga kon,
Edi azal bu makon.
Shukrona so‘ylar tillar,
Yana tiklandi imkon.

Belni bog‘la mard o‘g‘lon,
Bo‘lmagan shunday zamon.
Haq Kalomin ulug‘la,-
Kurashaver begumon.

Izidan qaytmas yo‘lbars,
Har bellashuv bo‘lsin dars.
Mutloq g‘oliblikkacha,-
Masofa olis emas.

Dovon oshsang peshma-kesh,
Natijalar bo‘ladi besh.
Omad tilar g‘olibga
Toshkandu, Samarqand, Kesh.

Senga qilishar havas,
Mardlarcha kelgansan bas.
Qur’onni yod ol butkul,
U tabarruk, muqaddas.

Davlatxon hoji.
Buxoro.
20. 01. 2018