Istig‘for va uning foydalari
Abdulloh ibn Abbos roziyallohu anhu Rasululloh sollallohu alayhi va sallamdan rivoyat qiladi: “Kimda-kim ko‘p istig‘for aytsa, Alloh o‘sha (banda) uchun har qanday g‘am-tashvishdan qutulish, tanglikdan chiqish yo‘lini (paydo) qiladi, uni o‘zi o‘ylamagan tomondan rizqlantiradi” (Abu Dovud, Ahmad, Tabaroniy, Hokim rivoyat qilgan ).
Gunoh banda boshiga g‘am-tashvish keltiradi. Turli muammolar, dilxiraliklar gunohlar tufayli paydo bo‘ladi. Mana shu muammoning davosi tavba, istig‘fordir.
Faraz qiling: bir odam boshiga og‘ir musibat tushdi, kutilmaganda boshi berk ko‘chaga kirib qoldi. Nima qilishni bilmayapti. Mana shunday paytda istig‘for asqatadi. Banda “Astag‘firulloh, astag‘firulloh”, deb Allohga yukinsa, Mehribon Parvardigor unga yordam beradi. Alloh ne’matlariga shukr qilgan, Unga hamdu sano, istig‘for aytgan bandani qiyin damlarda ko‘maksiz qoldirmaydi.
Tirikchilik masalasida qandaydir muammoga duch kelganda ham istig‘for aytiladi. Ja’far Sodiq shunday degan ekan: “Kimning rizqi (kelishi) kechiksa, istig‘for aytishni ko‘paytirsin ”.
Oylik maoshi kechikayotgan, savdosidan baraka ko‘tarilgan odam istig‘for aytsa, ishlari yurishib ketadi. Alloh ko‘p istig‘for aytgan bandani xayoliga kelmagan tomondan rizqlantiradi.
Qarzga botgan yoki birovga qarz berib, pulini ololmay yurgan odam ham istig‘for bilan murodiga yetadi.
Agar oilada notinchlik bo‘lsa, er-xotin o‘rtasida kelishmovchilik chiqsa yoki farzandlar itoatsizlik qilib, kattalar gapini ikki qilsa, istig‘for aytiladi.
Ba’zida insonning moddiy holati yaxshi bo‘lsayam negadir qalbi bezovta bo‘laveradi, puli bor, oshna-og‘aynilari, tanish-bilishlari bisyor, negadir qalbi notinch. Mana shunday paytda ham istig‘for aytilsa, ko‘ngildagi g‘ashlik ariydi. Ko‘p istig‘for aytgan inson o‘zini ancha yengil his qiladi. Chunki har safar istig‘for aytilganida dildagi qora dog‘lar yuviladi, dilxiralik barham topadi.
Boymi, kambag‘almi, yoshmi, qarimi, har bir inson istig‘for aytishga muhtoj. Sababi oddiy: inson ojiz va zaif. Hayotda har qanday muammoni changal-changal pul bilan, kazo-kazo tanish-bilishlar bilan hal etib bo‘lmaydi. Dunyoda pul bilan ham bitmaydigan ishlar juda ko‘p.
Xullas, istig‘for aytib qiyin vaziyatlardan chiqib ketish, muammolarni hal etish mumkin. Alloh bizga shunday imkoniyat bergan. Buning uchun Allohga hamdu sanolar aytamiz.
"Istig‘forning 40 xosiyati, Salavotlar" kitobidan
O‘MI Matbuot xizmati
Masjidlarda "yashil energiya": 1 900 dan ortiq jomeda quyosh panellari o‘rnatildi
So‘nggi yillarda mamlakatimizda qayta tiklanuvchi energiya manbalaridan keng foydalanish va ekologik barqarorlikni ta’minlashga alohida e’tibor qaratilmoqda. Ushbu ezgu tashabbus doirasida yurtimizdagi masjidlarda ham quyosh panellari va geleokollektorlarni o‘rnatish ishlari izchil davom ettirilmoqda.
2026 yil 29 iyul holatiga ko‘ra asosiy ko‘rsatkichlar:
Respublika bo‘yicha faoliyat yuritayotgan 2 161 ta masjiddan:
1 910 tasi (88,4%) quyosh panellari bilan ta’minlandi (umumiy quvvati — 14,3 MVt / 14 315,5 kVt);
1 020 tasi (47,2%) issiq suv ta’minoti uchun geleokollektorlar bilan jihozlandi (umumiy sig‘imi — 206 470 litr).
Hududlar kesimida yetakchilar:
To‘liq qamrov: Qoraqalpog‘iston Respublikasi, Sirdaryo, Xorazm va Qashqadaryo viloyatlaridagi deyarli barcha masjidlarga quyosh panellari o‘rnatib bo‘lindi.
Eng yuqori quvvat: Toshkent shahri (2 559 kVt), Toshkent viloyati (1 706 kVt) va Samarqand viloyati (1 436,5 kVt) yetakchilik qilmoqda.
Geleokollektorlar bo‘yicha: Andijon (182 ta), Namangan (181 ta) va Toshkent viloyati (172 ta) masjidlarida eng yuqori ko‘rsatkichlar qayd etildi.
Qayta tiklanuvchi energiya tizimlarining joriy etilishi elektr energiyasi va tabiiy gaz sarfini sezilarli darajada kamaytirib, masjidlarning kommunal xarajatlarini qisqartirish hamda atrof-muhit muhofazasiga munosib hissa qo‘shish imkonini bermoqda.
Kelgusida qolgan 251 ta masjidga quyosh panellari va 1 141 ta masjidga geleokollektorlarni bosqichma-bosqich o‘rnatish va respublikadagi sig‘imlarni to‘liq «yashil energiya»ga o‘tkazish rejalashtirilgan.
Nodirbek Qodirov,
O‘zbekiston musulmonlari idorasi
Masjidlar bilan ishlash bo‘limi mutaxassisi
