Qur’on musobaqasining jami ishtirokchilari soni va tarkibi e’lon qilindi
Allohga hamdlar bo‘lsinki, ommaviy tarzda o‘tkazilayotgan Qur’on musobaqasining ilk yilidayoq diyorimizda Allohning kalomiga muhabbat qo‘ygan qori yigit-qizlarimiz soni ming-minglab ekani yaqqol namoyon bo‘ldi. Musobaqaning ilk bosqichini kuzatar ekanmiz, qori va qoriyalarimizning yuzidagi nur, muomalasidagi samimiylik va qiroatidagi jozibadan barchamiz so‘z bilan ta’riflab bo‘lmaydigan darajada mamnunlikni his etdik.
Agar insonning qalbi Qur’onga muhabbatli bo‘lsa, uning qiroatidan lazzatlanadi, unga bor e’tiborini qaratadi va buning natijasida chuqur tushunish uchun tadabbur hosil bo‘ladi. Barcha ishlari o‘ngidan oladi, nafs istaklari kamayib, ixlosi ortib boraveradi. Aksincha, agar muhabbat bo‘lmasa, qalbning Qur’onga yuzlanishi qiyin bo‘ladi. Qur’onga tomon burilish faqatgina nafsini qattiq tergash, o‘zini majburlash orqali bo‘ladi.
Biz orzu qilgan komil inson va barkamol avlodlar mana shunday Qur’onga muhabbatli kishilardan chiqadi. Yaratgan Parvardigorga ming shukrki, mana shunday insonlar bizning o‘lkamizda hali juda ham ko‘p ekan. Bunday ulug‘ ne’matni Haq taolo bardavom aylasin, barcha mutasaddilardan Alloh taolo rozi bo‘lsin.
Tashkiliy hay’at tomonidan Matbuot xizmatiga ma’lum qilinishicha, Qur’on musobaqasi ishtirokchilarini ro‘yxat olish ishlari 15 yanvar kuni yakunlangan. Unga ko‘ra, jami ishtirokchilari soni 5366 nafarni tashkil etgan. Shundan 3263 nafar erkak 2103 nafari ayol-qiz ishtirokchilar ekan. Mana bu ko‘rsatkich haqiqiy kutilmagan natija, tarixiy voqea bo‘ldi.
Mana endi ko‘pchilik muhtaram Prezidentimizning Qur’on musobaqasini o‘tkazishga katta tashabbus ko‘rsatib: “Qur’onni eshitish, eshita olish yuksak ma’naviyat, ma’rifat. Qur’on hech qachon yomonlikka da’vat qilmaydi. Agar, Qur’oni karimni eshita olsak, eshittira olsak bu muvaffaqqiyat bo‘ladi. Elimizga nur keladi”, deb aytgan gaplarining hikmatini anglagan bo‘lsa, ajab emas...
Musobaqalarning o‘tish jarayonlarini kuzata turib, mana shunday fayzu barakotli kunlardan mamnun bo‘lgan hamyurtlarimizning ko‘zlari yosh ila qo‘llarini duoga ko‘tarib, uning shukronasi uchun yaratgan Parvardigorga hamdu sanolar aytishayotgani, bu ishga tashabbuskor bo‘lgan Davlatimiz rahbari, tashkiliy ishlarga bosh bo‘lib turgan olimu ulamolarimiz haqqiga duolar qilishayotganing bevosita guvohi bo‘ldik, Yaratgan Parvardigorga shukr.
Azizlar barchangizning e’tiboringizga Qur’on musobaqasi ishtirokchilarining mintaqa, ayol-erkak va yo‘nalishlar bo‘yicha sonini havola etamiz.
Qori va qoriyalarimizning chiqishlarini jonli kuzatib, Qur’onga bo‘lgan muhabbatimizni yanada sayqallashga chaqiramiz.
O‘zbekiston musulmonlari idorasi Matbuot xizmati
O‘zbekistonda jahon xattotlar tanlovi 26 avgustda e’lon qilinadi
O‘zbekistonda noyob Qur’on yaratish bo‘yicha jahon xattotlar tanlovi 26 avgust kuni O‘zbekistondagi Islom sivilizatsiyasi markazida e’lon qilinadi. Tanlov «Islom sivilizatsiyasi: yangi nigoh — yangi kashfiyotlar» xalqaro mediaforumi doirasida o‘tkaziladi, xabar bermoqda UzDaily.uz.
«Dunyo Qur’oni: xattotlik an’analaridan — kelajak merosi sari» loyihasini xattot va Islom sivilizatsiyasi markazi huzuridagi Xattotlik maktabi direktori Habibullo Solih taqdim etadi. Bu haqda tadbir tashkilotchisi xabar berdi.
Tanlov doirasida turli mamlakatlar va xattotlik maktablarining islomiy xattotlikdagi eng yaxshi an’analarini birlashtirgan noyob Qur’on yaratish ko‘zda tutilgan.
Tanlovning tantanali e’loni «Asrlarni birlashtiruvchi meros. Islom sivilizatsiyasining ma’naviy mazmunlari» mavzusidagi yalpi sessiyaning yakuniy qismi bo‘ladi. Sessiya 26 avgust kuni soat 09:30 dan 12:00 gacha o‘tkaziladi.
Tadbir doirasida ommaviy axborot vositalarining stereotiplar va islomofobiyani yengishdagi roliga bag‘ishlangan xalqaro muhokama ham bo‘lib o‘tadi. Unda Islom hamkorlik tashkiloti, Jazoir, Ummon, Pokiston, Saudiya Arabistoni, Iroq, Mali va O‘zbekistonning davlat tuzilmalari hamda OAV vakillari ishtirok etadi.
Forum dasturidan Qur’oniy va qo‘lyozma merosga bag‘ishlangan loyihalar ham o‘rin olgan. Ular orasida «114 Qur’on: islom olamining 114 xattotlik durdonasi», «Katta Langar Qur’oni: haqiqat va rivoyatlar» xalqaro loyihasi hamda «Sun’iy intellekt — qadimiy qo‘lyozmalarni o‘qishning raqamli kaliti» loyihasi bor.
O‘zbekistonda xattotlikni rivojlantirishga institutsional darajada ham e’tibor qaratilmoqda. Islom sivilizatsiyasi markazi huzurida Prezident Shavkat Mirziyoyev tashabbusi bilan tashkil etilgan Xattotlik maktabi faoliyat yuritmoqda. Maktabda suls, nasx, nasta’liq, ruq’a, devoniy va kufiy kabi an’anaviy yozuv uslublarini o‘rgatish rejalashtirilgan.
Xattotlik san’ati Samarqand viloyatidagi yangi Imom al-Buxoriy majmuasida ham namoyon etilgan. Majmua peshtoqlari va ayvonlari devorlari «Sahih al-Buxoriy»dan olingan hadislar bitilgan yozuvlar bilan bezatilgan. Majmua huzurida Imom Buxoriy xalqaro ilmiy-tadqiqot markazi va Hadis ilmiy maktabi ham faoliyat yuritadi.
Xalqaro mediaforumning asosiy maydoni O‘zbekistondagi Islom sivilizatsiyasi markazi bo‘ladi.
Tadbirda qariyb 50 mamlakatdan media va ekspertlar hamjamiyatining 300 ga yaqin vakili ishtirok etadi. Ular orasida mediakompaniyalar, axborot agentliklari va telekanallar rahbarlari, jurnalistlar, prodyuserlar, olimlar hamda kreativ industriya mutaxassislari bor.
O‘zbekiston musulmonlari idorasi matbuot xizmati
