O‘zbekiston Respublikasi Prezidentining 2017 yil 15 dekabrdagi PQ-3433-sonli “O‘zbekiston Islom akademiyasini tashkil etish chora-tadbirlari to‘g‘risida”gi Qaroriga asosan O‘zbekiston Islom akademiyasi O‘zbekiston Respublikasi Adliya vazirligi tomonidan davlat ro‘yxatidan o‘tkazildi.
Bugun, 16 yanvar kuni O‘zbekiston musulmonlari idorasida Adliya vazirligining Jamoat, nodavlat notijorat va diniy tashkilotlar boshqarmasi vakili muftiy Usmonxon Alimov hazratlariga va Islom akademiyasi rektori, akademik Ne’matulla Ibrohimovga Islom akademiyasi davlat ro‘yxatiga olingani to‘g‘risidagi guvohnomani topshirdi.
Muftiy Usmonxon Alimov hazratlari O‘zbekiston Respublikasi Prezidenti tashabbusi bilan tashkil qilingan ushbu Akademiya huzurida ikki yillik magistratura, uch yillik tayanch doktorantura va uch yillik doktorantura faoliyat yuritishi mo‘min-musulmonlarimiz uchun juda katta tuhfa bo‘lganini ta’kidladilar.
Ushbu Akademiyada “Qur’onshunoslik”, “Fiqh ilmi”, “Hadisshunoslik” va “Kalom ilmi” mutaxassisliklari bo‘yicha magistrlar, shuningdek, ushbu sohada chuqur tadqiqotlar olib boruvchi ilmiy-pedagog kadrlar tayyorlanishi yurtimizdan yana Imom Buxoriy, Imom Termiziy, Abdulxoliq G‘ijduvoniy, Bahouddin Naqshband kabi buyuk allomalar yetishib chiqishini asosiy omil ekanini bildirdilar.
Akademiya O‘zbekiston musulmonlari idorasi muassisligidagi diniy va dunyoviy ta’lim beruvchi nodavlat ta’lim va ilmiy-tadqiqot muassasasidir. Uning asosiy maqsadlari – respublikada faoliyat olib borayotgan oliy va o‘rta maxsus diniy ta’lim muassasalarini yuqori malakali ilmiy kadrlar bilan ta’minlash hamda tayyorlanayotgan mutaxassislarning ilmiy va kasbiy salohiyatini oshirish, shuningdek, qur’onshunoslik, tafsir va fikh, hadisshunoslik, kalom ilmi yo‘nalishlari bo‘yicha magistrlarni, yetuk ilmiy va ilmiy-pedagog kadrlarni tayyorlashdan iboratdir.
Akademiya O‘zbekistondan yetishib chiqqan buyuk alloma va mutafakkirlarning boy ilmiy merosini, Islom dini rivojiga ulkan hissa qo‘shgan jahon allomalarining asarlarini o‘rganish, ilmiy-tadqiqot ishlarini olib borish, din niqobi ostida harakat qilayotgan turli oqim va yo‘nalishlarning buzg‘unchi g‘oyalariga qarshi ilmiy raddiyalar tayyorlash va boshqa bir qator muhim vazifalar bilan ham shug‘ullanadi.

O‘zbekiston musulmonlari idorasi Matbuot xizmati