Vatanparvarlik – ulug‘ fazilat
Tabiiyki, kindik qoni to‘kilgan joy inson uchun hamma narsadan ham qimmatli dargohdir. Rasuli Akram sollallohu alayhi vasallam Madinai munavvaraga hijrat qilib ketayotganlarida tug‘ilib o‘sgan vatani Makkai mukarramaga yuzlanib turib: “Agar qavmim meni chiqib ketishga majbur qilmaganida, hech ham o‘z ixtiyorim bilan uni tashlab ketmagan bo‘lur edim”, deganlari siyrati nabaviya kitoblarida bayon etilgan.
Demak, Vatanni sevish, vatanparvar bo‘lish, undagi bor narsalarni ardoqlab, sog‘inib yashash insoniyat tabiatida mavjud bo‘lgan nozik his-tuyg‘udir.
Buyuk alloma Alisher Navoiy hazratlarining quyidagi so‘zida ona-Vatanini sevuvchi sadoqatli har bir kishining qalbida g‘ayrat va shijoat uyg‘otadi:
Vatan tarkini bir nafas aylama,
Ani ranji – g‘urbat, havas aylama.
Donolar aytadilar: “Kishining vafodorligi va sadoqati uning o‘z Vatani uchun qayg‘urishidan, do‘stlarini sog‘inishidan va umrining zoye ketkazgan lahzalariga achinib, o‘kinib yashashidan bilinadi”. Insonning o‘z xalqiga bo‘lgan sadoqati va fidoiyligi ona Vatanni himoya qilishi, taraqqiy topib, har tomonlama mustahkam va qudratli bo‘lishi hamda xalqining tinch va farovon hayot kechirishiga imkon darajada hissa qo‘shishi bilan o‘lchanadi.
Vatan himoyasi barchamizning muqaddas burchimiz! Diniy-ma’naviy qadriyatlarimiz qaytadan xalqimizga qaytarildi. Imon-e’tiqodimiz va ertangi kunga bo‘lgan ishonchimiz mustahkamlandi. Shaharu qishloqlarimiz ko‘rkam va obod bo‘ldi. Hayotimizga beqiyos ma’no va mazmun olib kirgan bu bebaho ilohiy ne’matlarning qadriga yetish, ularga shukr qilish, uni asrab-avaylash barchamizning burch va vazifamizdir.
1992 yil 14 yanvar kuni mustaqil davlatimiz tarixida muhim voqea yuz berdi. Respublikamiz Qurolli Kuchlari tashkil topdi. 1993 yildan e’tiboran 14 yanvar yurtimizda “Vatan himoyachilari kuni”, deb e’lon qilindi.
Ana ushbu shonli sananing 26 yilligini nishonlash arafasida turibmiz.
Ushbu qutlug‘ sana bilan yuragida Vatan va xalq sevgisi mahkam joy olgan shijoatli o‘g‘lonlar, yurt sarhadlarini sergaklik bilan qo‘riqlayotgan aka-ukalamiz qatori, yurt tinchligi va osoyishtaligi yo‘lida turli sohalarda xizmat qilayotgan barcha vatandoshlarimizni muborakbod etamiz.
Abdug‘ulom MЕLIBOYEV,
“Sayyid Muhyiddin maxdum” o‘rta maxsus islom bilim yurti mudirining ma’naviyat-marifat ishlari bo‘yicha o‘rinbosari
O‘MI Matbuot xizmati
Makkada Qur’oni karim bo‘yicha xalqaro musobaqa boshlandi
Makkada Qur’oni karimni yod olish, o‘qish va sharhlash bo‘yicha 46-xalqaro tanlov boshlandi.
IQNA "Saudi Gazette" nashriga tayanib xabar berishicha, payshanba kuni Makkada Qur’oni karimni yod olish, o‘qish va sharhlash bo‘yicha qirol Abdulaziz nomidagi 46-xalqaro tanlov boshlandi.
Oltinchi rabiulavvalga (19 avgustga to‘g‘ri keladi) qadar davom etadigan musobaqada 133 mamlakatdan jami 334 nafar erkak va ayollar ishtirok etmoqda, bu ushbu musobaqa tarixidagi eng katta vakillikdir.
Musobaqaning maqsadi "musulmon yoshlarni Qur’oni Karimni yod olish, anglash va mushohada qilishga undash, shuningdek, halol raqobatni yaratishdan iborat."
Tanlov beshta toifani o‘z ichiga oladi va umumiy sovrinlar miqdori 10 260 000 Saudiya rialini tashkil etadi - bu tanlov ta’sis etilganidan beri eng yuqori sovrin jamg‘armasi.
Avvalroq ushbu musobaqada O‘zbekiston sharafini quyidagilar himoya qilishi xabar qilingandi:
Muhammadabror qori Yunusxonov («Mir Arab» o‘rta maxsus islom bilim yurti talabasi) — (To‘liq Qur’on hifzi);
Muhammadamin qori Olimjonov («Sayyid Muhyiddin maxdum» o‘rta maxsus islom bilim yurti talabasi) — (15 pora hifzi);
Zilolaxon Farhodova (Imom Buxoriy nomidagi Toshkent islom instituti talabasi) — (To‘liq Qur’on hifzi);
Muxtasarxon Muhammadjonova («Xadichai Kubro» ayol-qizlar o‘rta maxsus islom bilim yurti talabasi) — (15 pora hifzi).
O‘zbekiston musulmonlari idorasi Matbuot xizmati
