Musobaqada qatnashuvchilarni ro‘yxatga olish jarayoni hali davom etmoqda, deb xabar beradi Qur’on musobaqasini o‘tkazish bo‘yicha Tashkiliy qo‘mita. O‘zbekiston musulmonlari idorasining muslim.uz rasmiy portalida muhtaram Prezidentimiz tashabbuslari bilan o‘tkazilayotgan Qur’on musobaqasi haqida muntazam xabar berib kelmoqdamiz.

Xabaringiz bor, ushbu musobaqaga ishtirokchilarni ro‘yxatga olish joriy yilning 4 yanvar kunidan boshlangan edi. O‘tgan qisqa vaqt ichida bir necha yuzlab yurtdoshlarimiz Qur’on musobaqasida ishtirok etish uchun hujjat topshirishdi. “Katta xursandchilik, kuchli ishtiyoq bilan hujjat topshirishga kelayotgan mo‘min-musulmon yurtdoshlarimizni ko‘rib, ko‘zingiz quvnaydi va beixtiyor muhtaram Prezidentimizning kuni kecha Toshkent viloyatiga qilgan tashriflari chog‘ida: “Qur’onni eshitish, eshita olish yuksak ma’naviyat, ma’rifat. Qur’on hech qachon yomonlikka da’vat qilmaydi. Agar, Qur’oni karimni eshita olsak, eshittira olsak bu muvaffaqqiyat bo‘ladi. Elimizga nur keladi” degan so‘zlari naqadar haqiqat ekanini anglaysan kishi”, deydi Tashkiliy qo‘mita raisi Abdulhakim qori Matqulov.

Tashkiliy qo‘mitaning O‘zbekiston musulmonlari idorasi Matbuot xizmatiga ma’lum qilishicha, musobaqada ishtirok etish uchun joriy yilning 8 yanvar holatiga ko‘ra, Respublika bo‘yicha 556 nafar erkak va 177 nafar ayol kishi jami 733 nafar yurtdoshlarimiz hujjat topshirishgan.

Eslatib o‘tamiz, Qur’on musobaqasida 18 yoshdan 40 yoshgacha bo‘lgan barcha fuqarolarimiz hifz va tilovat yo‘nalishlari bo‘yicha qatnashishlari mumkin. Ishtirokchilarini ro‘yxatga olish 13 yanvar kuniga qadar davom etadi.

O‘MI Matbuot xizmati