Xalqimizda “Mehnatdan kelsa boylik – turmush bo‘lar chiroylik”,  degan ajoyib maqol bor. Albatta, mehnat kishini ulug‘laydi. Ammo mehnat qilish uchun ham kishida ilm, aql, fahmu farosat bo‘lishi kerak. Alloh taolo Baqara surasining 172-oyatida “Ey, imon keltirganlar! Allohgagina ibodat qiluvchi bo‘lsangiz, sizlarga Biz rizq qilib bergan pokiza narsalardan yeb, Unga shukr qilingiz!” deb marhamat qilgan.

Demak, mehnatimiz halollik asosida bo‘lishi va poklik mezonida o‘lchanishligi kerak ekan.

Tarixga nazar soladigan bo‘lsak, Odam alayhissalom dehqonchilik, Idris alayhissalom xattotlik, Nuh alayhissalom durodgarlik, Dovud alayhissalom esa temirchilik bilan shug‘ullangan. Payg‘ambarlar mehnat bilan shug‘ullanib bizlarga o‘rnak bo‘lgan ekan, bizlar ham o‘zimiz yoqtirgan kasbning ustasi bo‘lib, oilamizni halol pokiza rizq bilan boqishimiz kerak.

Imom Buxoriy rivoyat qilgan hadisda Payg‘ambarimiz sollallohu alayhi vasallam shunday deganlar: “Kimki tilanchilik qilishdan saqlanish, oilasini boqish va qo‘ni-qo‘shnilariga muruvvat qilish maqsadida halol yo‘l orqali rizq topish bilan mashg‘ul bo‘lsa, qiyomat kunida u Alloh taologa yuzi to‘lin oydek yorug‘ bo‘lgan holda yo‘liqadi”. Bu hadisi sharif har birimizning dasturul amalimiz bo‘lishi zarur.

Halol mehnat kishini ulug‘laydi va jannatga yetaklaydi. Tabaroniy rivoyat qilgan hadisda Payg‘ambarimiz sollallohu alayhi vasallam shunday marhamat qilganlar: “Gunohlar ichida shundaylari borki, unga faqat halol rizq topish maqsadida qilingan harakatgina kafforat bo‘ladi”. Shunday ekan, kelajagimiz bo‘lmish jondan aziz farzandlarimizga halol kasb-hunar o‘rgatib, ularni hech qachon o‘zgalarning haqiga ko‘z tikmaydigan, vatani, xalqi, dini uchun jon fido qiladigan ruhda tarbiya qilmog‘imiz lozim.

Ashraf TOSHMURODOV,

Bulung‘ur tumanidagi “Poyga tepa” jome masjidi imom-xatibi