“Umra –2018” shartnomasi imzolandi
Kecha, 26 dekabr kuni O‘zbekiston musulmonlari idorasida haj va umra safarlari bo‘yicha Saudiya Arabistonidagi hamkor “al-Hidoya” shirkati rahbari Shayx Solih Solim Bahvayniy bilan uchrashuv bo‘lib o‘tdi. Mehmonni Din ishlari bo‘yicha qo‘mita raisi Ortiqbek Yusupov va O‘zbekiston musulmonlari idorasi raisi, muftiy Usmonxon Alimov hazratlari kutib olishdi.
Muftiy hazratlari uchrashuv avvalida so‘z olib, “al-Hidoya” shirkati bilan ko‘p yillardan buyon hamkorlik qilib kelinayotgani, haj va umra safarlari muvaffaqiyatli o‘tayotganini bildirdilar. Shuningdek, kelgusi haj va umra safarlarida ziyoratchilarga xizmat ko‘rsatishni yuqori darajaga ko‘tarish, mehmonxona, transport xizmati va taomlar sifatini yanada yaxshilash, Mino va Muzdalifa vodiylarida yetarli joy ajratishga erishish hamda ishchi, oshpazlar va tibbiyot guruhlarini barcha zarur shart-sharoitlar bilan ta’minlash kabi masalalarni alohida qayd etdilar.
Muloqotda Ortiqbek Yusupov haj va umra mavsumlarida Madina shahrida ham yangi mehmonxonani olish, umumiy ovqatlanish joyi bo‘lishiga e’tibor qilish, ishchi va tibbiyot guruhlariga alohida xizmat xonalari ajratish kabi masalalalrni hal etish zarurligini ta’kidladi.
Hamkor “al-Hidoya” shirkati rahbari Shayx Solih Solim Bahvayniy o‘zbekistonlik haj va umra ziyoratchilariga xizmat qilish sharaf ekani, shu kunga qadar bu borada katta yutuqlarga erishib kelinayotgani, natijada, ziyoratchilarga hamkor emas, balki bir oiladek xizmat qilinayotganini bildirdi. Solih Bahvayniy so‘zida davom etib, yuqorida qayd etilgan barcha masalalar va talablarni bajarishga imkoni borligini bildirib, ishonchni to‘la oqlash uchun bor kuch-quvvatini ishga solishini ta’kidladi. U so‘zining yakunida o‘zaro ishonchli hamkorlik uchun minnatdorlik izhor qildi.
Uchrashuv yakunida tomonlar “Umra–2018” mavsumi bo‘yicha shartnoma imzoladilar. Unga ko‘ra, bahor mavsumida 8500 nafar, ramazon mavsumida 1500 nafar yurtdoshlarimiz umra ziyoratini ado etishi belgilangan. "Umra – 2018" bahor mavsumi 2018 yil 1 fevraldan boshlanishini rejalashtirilgan.
O‘zbekiston musulmonlari idorasi
Matbuot xizmati
Toshkentda Malayziya xalqaro Halal Fest ko‘rgazmasi o‘kazilishi rejalashtirilmoqda
O‘zbekiston va Malayziya o‘rtasida halol sanoati yo‘nalishidagi hamkorlik yangi bosqichga chiqmoqda. Qishloq xo‘jaligi vazirligida bo‘lib o‘tgan uchrashuvda ikki mamlakat vakillari “Malaysia–Uzbekistan International Halal Fest 2027” xalqaro forumi va ko‘rgazmasini Toshkent shahrida o‘tkazish istiqbollarini muhokama qildilar.
Malayziyaning TWOJ CREATIVE SDN BHD kompaniyasi delegatsiyasi tomonidan taqdim etilgan loyiha halol sanoati ekotizimini rivojlantirish, xalqaro biznes aloqalarini mustahkamlash hamda yangi investitsiya loyihalarini shakllantirishga qaratilgani bilan ahamiyatlidir.
Rejalashtirilayotgan festival doirasida xalqaro ko‘rgazma, biznes-forum va B2B uchrashuvlari, halol oziq-ovqat, turizm, moliya hamda ishlab chiqarish yo‘nalishlariga bag‘ishlangan maxsus ekspozitsiyalar, investitsiya sessiyalari, madaniy dasturlar va mahsulotlar taqdimotlarini tashkil etish ko‘zda tutilmoqda. Ushbu tadbir O‘zbekistonning halol mahsulotlar bozoridagi salohiyatini namoyish etish va mahalliy ishlab chiqaruvchilar uchun yangi eksport imkoniyatlarini yaratishga xizmat qilishi kutilmoqda.
Muzokaralar davomida JAKIM standartlari asosida halol sertifikatlashtirish tizimini rivojlantirish, mahalliy ishlab chiqaruvchilarni xalqaro bozorlarga olib chiqish, fermer va tadbirkorlar uchun o‘quv-seminarlar hamda malaka oshirish dasturlarini tashkil etish masalalari ham muhokama qilindi.
Tomonlar festivalni yuqori saviyada tashkil etish maqsadida tegishli vazirlik va idoralar, oliy ta’lim muassasalari, biznes hamjamiyati hamda tarmoq uyushmalarini jalb etgan holda qo‘shma “Yo‘l xaritasi”ni ishlab chiqishga kelishib oldilar.
Mutaxassislarning fikricha, “Malaysia–Uzbekistan International Halal Fest 2027” nafaqat ikki mamlakat o‘rtasidagi savdo-iqtisodiy aloqalarni mustahkamlaydi, balki investitsiyalarni jalb etish, halol sanoati infratuzilmasini rivojlantirish va oziq-ovqat xavfsizligini ta’minlash yo‘nalishidagi hamkorlikni yangi bosqichga olib chiqadigan muhim xalqaro maydonga aylanishi kutilmoqda.
O‘zbekiston musulmonlari idorasi Matbuot xizmati
