Islom inson sog‘ligiga jiddiy ahamiyat qaratadigan hamda sihat-salomatlikni saqlashning barcha ko‘rinishlarini mukammal bayon etgan va bu borada kerakli tavsiya va ko‘rsatmalar bergan dindir. Unda sog‘likka zarar beradigan ishlardan qaytarib: “Islomda o‘ziga va birovga zarar berish yo‘q!” kabi so‘zlarning buyuk ishoraga aylanishi, sog‘likka zarar yetkazadigan har qanday narsaning harom qilinishi va boshqa ko‘plab sog‘liqni saqlash borasida beqiyos ahamiyatga ega bo‘lgan hadisu oyatlar so‘zimizning yorqin dalilidir.

 Farzandining ham jisman, ham aqlan sog‘lom bo‘lib voyaga yetishi harqanday ota-onaning ko‘zini quvnatib, ko‘ngliga cheksiz surur bag‘ishlashi tabiiy. Lekin, bu narsa uning tarbiyasi va parvarishidan mas’ul bo‘lgan shaxslar ustiga biroz mashaqqat, e’tibor va davomli mehnat yuklaydi. Zero, bu doimiy ravishda farzand sog‘ligidan xabardor bo‘lish, uni kasalga chalinishdan, shikastlanishdan muhofaza qilish, bordiyu xastalanib qolsa, darhol kerakli chora-tadbirlarni ko‘rish kabi ishlarni taqozo qiladi.

Yurt farzandlarining salomatligini ta’minlash maqsadida O‘zbekiston Respublikasi Prezidenti Shavkat Mirziyoyev kecha, 25 dekabr kuni “2018-2022 yillar davrida bolalarda tug‘ma va irsiy kasalliklarni barvaqt aniqlash Davlat dasturi to‘g‘risida”gi qarorni imzoladi.

Respublikada sog‘lom bolalar tug‘ilishi, homilador ayollar va chaqaloqlarda patologiyani barvaqt aniqlash uchun zarur shart-sharoitlarni ta’minlaydigan zamonaviy perinatal markazlar hamda “Ona va bola skrining” markazlari tarmog‘i yaratildi, tug‘ruqqa yordam beruvchi va pediatriya muassasalarining moddiy-texnika bazasi va kadrlar salohiyati mustahkamlandi, tug‘ma va irsiy kasalliklarga tashxis qo‘yish, davolash hamda ular profilaktikasining zamonaviy usullari joriy etildi.

Amalga oshirilayotgan tadbirlar natijasida 1,1 milliondan ortiq homilador ayol tekshiruvdan o‘tkazildi, bu 21 ming nafardan ortiq rivojlanishida tug‘ma nuqsonlar bo‘lgan bola tug‘ilishining oldini olish imkonini berdi. 1,7 milliondan ortiq chaqaloq tug‘ma va irsiy kasalliklar yuzasidan tekshirildi, 2,7 ming nafar bolaga rivojlanishning tug‘ma nuqsonlarini bartaraf etish yuzasidan malakali tibbiy yordam ko‘rsatildi.

Shu bilan birga, tug‘ma va irsiy kasalliklarning oldini olish bo‘yicha profilaktik va davolash-tashxis qo‘yish tadbirlarini, ayniqsa, qishloq joylarda bo‘lajak onalar va bolalarning sog‘lig‘i holati ustidan patronaj tizimini yanada takomillashtirish, shuningdek, jahon amaliyotiga muvofiq tug‘ruqqa yordam beruvchi muassasalarning va “Ona va bola skrining” markazlarining moddiy-texnika bazasini mustahkamlash talab etiladi.

Qarorning to‘liq matni bilan ushbu havola orqali tanishishingiz mumkin.

O‘MI Matbuot xizmati