Qur’on yodlashning oltin qoidalaridan xabardormisiz?
Har bir musulmon kishi Kalomullohni yodlash va unga amal qilishga intiladi. Hadislarda Qur’onni yod olgan kishiga ko‘p mukofotlar va’da qilingan. Jumladan: hazrat Usmondan (roziyallohu anhu) rivoyat qilinadi: Rasululloh (sollallohu alayhi va sallam) dedilar: “Sizlarning yaxshilaringiz Qur’onni o‘rganib, uni boshqalarga ham o‘rgatganlaringizdir” (Imom Buxoriy rivoyati). Boshqa hadisda Rasululloh (sollallohu alayhi va sallam): “Qur’onni o‘qinglar, chunki u qiyomat kuni o‘quvchilariga shafoatchi bo‘ladi”, deganlar (Imom Muslim rivoyati).
Quyida Qur’onni oson va puxta yodlashning ayrim qoidalarini bayon qilamiz:
- Qur’onni yodlashda Allohga tavakkal qilish, ya’ni u Zotning roziligini istab, bu yo‘lda g‘ayratli bo‘lish.
- Har kuni Qur’onning bir qismini tilovat qilishga odatlanish. Chunki Rasululloh (sollallohu alayhi va sallam): “Amalning yaxshisi oz bo‘lsa ham, davomlisidir”, deganlar (muttafaqun alayh).
- Bitta mus'hafdan yodlash va takror qilish. Shunda har bir sahifadagi oyatlarning joylashishi qori zehniga o‘rnashib, xotirasiga kelaveradi.
- Yodlangan oyatlarni ustozning tekshiruvidan o‘tkazish. Chunki Qur’onni o‘zicha o‘qib, yodlab, takrorlagan kishi xatosini bilmaydi. Ustozdan o‘tkazgan kishining esa xatolari tuzatiladi va yodlaganlari mustahkamlanadi.
- Kechalari Qur’onga qarab tilovat qilish. Kechasi fikr ko‘p chalg‘imaydi, ixlos bilan tilovat qilish ham oyatlarning qalbdan mustahkam joy olishiga sabab bo‘ladi.
- Yod olishga qiynalgan yoki xato o‘qilgan oyatlarning tagiga qalam bilan chizib qo‘yish. Xatolar to‘g‘rilanganidan keyin chiziq o‘chirib tashlanadi. Shuning uchun ham qorining alohida Qur’oni bo‘lishi kerak.
- Oyatlarning ma’nolarini bilish ham tez va puxta yodlash sabablaridandir.
- Arab tili nahv qoidalarini bilish qorilarni ko‘p xatolardan saqlaydi. Natijada, talaba oyatlarga harakatlarni to‘g‘ri qo‘yib, erkin va ravon o‘qiydigan bo‘ladi.
- Qur’on oyatlarini tafakkur qilish o‘xshash oyatlarni bir-biriga chalkashtirib yuborishdan saqlaydi.
Sahar payti, shom bilan xufton namozlari oralig‘i hamda zehn dunyoviy narsalar bilan mashg‘ul bo‘lmaydigan boshqa vaqtlar Qur’onni yod olish va takrorlash uchun qulay, fazilatli hisoblanadi.
O‘MI Matbuot xizmati
Bayram shukuhi Jizzaxda ham davom etmoqda
O‘zbekiston Respublikasi davlat mustaqilligining 35 yilligi arafasida “Vaqf” xayriya jamoat fondining Jizzax viloyati filiali tomonidan xayriya tadbiri tashkil etildi.
Viloyatning turli hududlaridan bo‘lgan boquvchisini yo‘qotgan 35 nafar bolaning xatna to‘yi qilib berildi.
Tadbirda bolajonlarga velosiped, kostyum-shim va ko‘ylaklar, shirinliklar qutisi sovg‘a qilinib, bayram dasturxoni yozildi.
Bolajonlarga qo‘shilib, ularning yaqinlari ham quvonchdan tashakkur aytib, tashkilotchilar, Yurtboshimiz haqlariga duolar qilishdi.
Shuningdek, tadbir doirasida ijtimoiy himoyaga muhtoj, boquvchisini yo‘qotgan hamda kam ta’minlangan oilalar farzandlariga e’tibor va g‘amxo‘rlik ko‘rsatilib, ularga ham hadyalar ulashildi.
Bunday ezgu tashabbuslar jamiyatda o‘zaro mehr-oqibat, saxovat va hamjihatlik muhitini mustahkamlash, yosh avlod qalbida Vatanga muhabbat va insonparvarlik tuyg‘ularini yuksaltirishga xizmat qiladi.
O‘zbekiston musulmonlari idorasi
Matbuot xizmati
