O‘zbekiston Respublikasi Vazirlar Mahkamasi huzuridagi Millatlararo munosabatlar va xorijiy mamlakatlar bilan do‘stlik aloqalari qo‘mitasi tomonidan “O‘zbekiston: millatlararo munosabatlarni rivojlantirishning yangi bosqichi” mavzuida ilmiy-amaliy anjuman o‘tkazildi. Bu haqda O‘zA xabar berdi.

O‘zbekiston Respublikasi Konstitutsiyasi qabul qilinganining 25 yilligiga bag‘ishlangan tadbir Oliy Majlis Qonunchilik palatasining Xalqaro ishlar va parlamentlararo aloqalar qo‘mitasi, O‘zbekiston Respublikasi Inson huquqlari bo‘yicha Milliy markazi, O‘zbekiston Xotin-qizlar qo‘mitasi hamkorligida tashkil etildi. Unda milliy madaniyat markazlari, do‘stlik jamiyatlari, turli jamoat tashkilotlari vakillari ishtirok etdi.

Tadbirda mamlakatimiz Konstitutsiyasida irqi, jinsi, diniy e’tiqodidan qat’i nazar, barcha fuqarolar tengligi belgilab qo‘yilganligi ta’kidlandi. Prezidentimizning 2017 yil 19 maydagi “Millatlararo munosabatlar va xorijiy mamlakatlar bilan do‘stlik aloqalarini yanada takomillashtirish chora-tadbirlari to‘g‘risida”gi farmoniga muvofiq Respublika baynalmilal madaniyat markazi negizida Vazirlar Mahkamasi huzuridagi Millatlararo munosabatlar va xorijiy mamlakatlar bilan do‘stlik aloqalari qo‘mitasi tashkil etildi.

O‘zbekiston Respublikasi Inson huquqlari bo‘yicha Milliy markazi direktori, Oliy Majlis Qonunchilik palatasining Demokratik institutlar, nodavlat tashkilotlar va fuqarolarning o‘zini o‘zi boshqarish organlari qo‘mitasi raisi A.Saidov Bosh qomusimizning yaratilish tarixi haqida so‘zlab berdi hamda BMT Bosh kotibi Antoniu Guterrish, BMT Inson huquqlari bo‘yicha kengashining din va e’tiqod erkinligi masalasi bo‘yicha maxsus ma’ruzachisi Ahmad Shahid joriy yil yurtimizda bo‘lib, O‘zbekistonning millatlararo totuvlik va hamjihatlik borasida erishilgan yutuqlarini yuksak baholaganini alohida qayd etdi.

Anjumanda tarix fanlari doktori, professor Rahbar Murtazoyeva, Oliy Majlis Qonunchilik palatasi deputati Qodir Jo‘rayev, Vazirlar Mahkamasi huzuridagi Millatlararo munosabatlar va xorijiy mamlakatlar bilan do‘stlik aloqalari qo‘mitasi bo‘lim boshlig‘i B.Karimov “O‘zbekiston ijtimoiy hayotida bag‘rikenglik tamoyillarining o‘rni va ahamiyati”, “Mustaqil O‘zbekistonda millatlararo munosabatlarni rivojlantirish jarayoni va bag‘rikenglik masalalari”, “Globallashuv va axborot sivilizatsiyasi davrida bag‘rikenglik masalalari” kabi mavzularda ma’ruza qildi.

So‘zga chiqqanlar Konstitutsiyamizda belgilangan tamoyillar jamiyatda millatlararo hamjihatlik va barqarorlikni yanada mustahkamlashda muhim ahamiyatga ega ekanini ta’kidladi. Millatlararo totuvlikni yanada mustahkamlashda Prezidentimiz Shavkat Mirziyoyev tashabbusi bilan ishlab chiqilgan 2017-2021 yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasining o‘rni beqiyosdir.

Tadbirda milliy madaniyat markazlari va do‘stlik jamiyatlari faoliyati samaradorligini yanada oshirish masalalari muhokama etildi, dolzarb masalalar yechimi bo‘yicha tegishli tavsiyalar berildi.