Surxondaryo viloyati Sho‘rchi tumanidagi masjidlar soni yana bittaga ko‘paygani haqida oldinroq xabar bergan edik. Mazkur xabarda  tumandagi “Tolli ota” jome masjidi Surxondaryo viloyati Adliya boshqarmasidan ro‘yxatdan o‘tkazilib, O‘zbekiston musulmonlari idorasi tomonidan mazkur masjid ish boshlashi to‘g‘risida ma’lumot berilgan edi.

O‘tgan juma, 8 dekabr kuni esa aynan shu  “Tolli ota” jome masjidining ochilish marosimi bo‘lib o‘tdi. Ushbu mo‘jazgina jome O‘zbekiston Respublikasi Konstitutsiyasi qabul qilinganining 25 yillik to‘yiga munosib to‘yona bo‘ldi. Shu munosabat  bilan masjidda shukrona dasturxoni yozildi. Ushbu tadbirda diniy idora masjidlar bo‘limi mas’ul xodimi Is'hoqjon domla Begmatov, Surxondaryo viloyati bosh imom-xatibi Aliakbar domla Sayfiddinov, viloyatdagi mutasaddilar va ko‘plab namozxonlar ishtirok etishdi.

Tadbir bayramona kayfiyatda o‘tdi. Unda Is'hoqjon domla Begmatov so‘zga chiqib, tadbir ishtirokchilarini qo‘shaloq  xursandchiliklar, ya’ni Bosh Qomusimiz qabul qilinganining 25 yillik to‘yi va “Tolli ota” jome masjidi ochilishi bilan tabriklab, muftiy Usmonxon Alimov hazratlarining masjid qavmiga salom va tabriklarini yetkazdi.

Shundan so‘ng barcha juma namozini o‘qish uchun masjid xonaqosiga taklif etildi. Juma namozidan keyin duoga qo‘l ochilib, mana shunday buyuk ne’matlar ila yurtimizni, xalqimizni siylayotgan Yaratgan Parvardigorga hamdu sano aytilib, yurtimizda bo‘layotgan ulkan o‘zgarishlar asoschisi bo‘lmish Davlatimiz rahbari, ularning yonlarida diniy sohada suyanchiq va ko‘makchi bo‘lib turgan muftiy hazratlari, mehnatkash xalqimiz va mo‘min-musulmonlarimiz haqiga duolar qilindi.

Yana bir bor yangi masjid muborak bo‘lsin.

O‘zbekiston musulmonlari idorasi Matbuot xizmati