“Rasululloh bizga o‘rnak”
Yurtimizning masjid va madrasalarida muborak mavlidi sharif oyi munosabati bilan Payg‘ambarimiz Muhammad mustafo sollallohu alayhi vasallam hayotini o‘rganish bo‘yicha fayzli tadbirlar tashkil qilinmoqda. Jumladan, Imom Faxriddin ar-Roziy o‘rta maxsus islom bilim yurtida ham har yilgi an’anaga binoan kuni kecha “Rasululloh bizga o‘rnak” shiori ostida mavlid tadbiri hamda siyrat musobaqasi tashkil qilindi.
Tadbir O‘zbekiston musulmonlari idorasi Xorazm viloyat vakilligi, bilim yurti rahbariyati hamda Toshkent islom instituti amaliyotchi talabalari bilan hamkorlikda tashkil qilinib, unda bilim yurti mudarris va talabalari bilan birgalikda, talabalarning ota-onalari, mehmonlar ishtirok etishdi.
Tadbir an’anaga muvofiq Qur’oni karim tilovati bilan boshlandi. So‘ngra O‘MI Xorazm viloyat vakili X.Abdullayev kirish so‘zi bilan tadbirni ochib berdi. Payg‘ambarimiz alayhissalom hayotlarining har bir nuqtasi biz musulmonlar uchun ibrat bo‘lmog‘i lozim, u zotning har bir sunnatlariga amal qilish bilan biz o‘z muhabbatimizni izhor qilishimiz mumkinligi haqida gapirib, bugungi tadbirning ahamiyatini tushuntirib o‘tdi.
Shundan so‘ng 2-3-4-kurs talabalari orasida 5 ta yo‘nalishda:
- Payg‘ambar alayhissalom hayoti bo‘yicha 10tadan tezkor savol;
- Nubuvvat tarixidagi voqealar tafsiloti bo‘yicha 3 tadan savol;
- Payg‘ambarimiz alayhissalomga bag‘ishlab salavot va nashidalar aytish;
- Payg‘ambarimiz alayhissalom siyratlari bo‘yicha buklet yoki plakat tayyorlash;
- Payg‘ambarimiz alayhissalom sahobalarining ismlarini sanash shartlari bo‘yicha musobaqa tashkil qilindi.
Tadbir davomida joriy oyda bilim yurti talabalari o‘rtasida “Rasululloh bizga o‘rnak” mavzusidagi insholar tanlovining ham g‘oliblari e’lon qilinib, musobaqa va tanlov g‘oliblari O‘MI Xorazm viloyat vakilligi hamda bilim yurti homiylari ko‘magida munosib taqdirlandi.
Tadbir so‘nggida Imom Barzanjiy rahmatullohi alayhning “Mavlidi sharif” asari o‘qilib, xatmi Qur’on qilindi.
Tadbir yakunida bayram dasturxoni yozilib, mudarris va talabalarga osh qilib berildi.
Imom Faxriddin ar-Roziy O‘MIBYU mudir muovini O.Adilov
Hijriy yangi yilingiz muborak bo‘lsin!
2025 yilning 26 iyun kuni – yangi 1447 hijriy yil – Muharram oyi boshlanishining 1 kunidir. Ashuro kuni 2025 yilning 5 iyul, shanba kuniga to‘g‘ri keladi.
Muharram oyi qanday oy?
Muharram oyi – musulmonlar taqvimining birinchi oyidir. Bu oy Alloh taolo urush, qon to‘kishni harom qilgan (Zulhijja, Zulqa’da, Muharram, Rajab) to‘rt oyning biri bo‘lib, uning o‘ninchi kuni ya’ni, ashuro kuni alohida fazilatlarga ega.
Ashuro qanday kun?
Bu kun haqida Rasululloh sollallohu alayhi vasallam: “Bu shunday yaxshi kundirki, bu kunda Alloh Bani Isroilni dushmanlaridan qutqargan. Shu bois Muso alayhissalom bu kunda ro‘za tutgan. Men Musoga ko‘proq (yaqin bo‘lishga) haqliroqman”, dedilar va u kunda ro‘za tutib, odamlarni ham uning ro‘zasini tutishga buyurdilar” (Imom Buxoriy rivoyati).
Ashuro kuni ro‘za tutish o‘tgan bir yillik gunohlarga kafforat bo‘ladi.
Bu haqda Rasululloh sollallohu alayhi vasallam: “Ashuro kunining ro‘zasi – Allohdan umid qilamanki – bir yil oldingi gunohlarga kafforat bo‘ladi”, deganlar (Imom Muslim rivoyati).
Bu kun yaqinlarga kengchilik qilish, bir yillik kengchilikka sabab bo‘ladi.
Abu Sa’d roziyallohu anhudan rivoyat qilinadi. Nabiy sollallohu alayhi vasallam: “Kim Ashuro kuni ahli ayoliga kenglik yaratsa, Alloh unga yil bo‘yi kenglik yaratadi”, dedilar (Imom Bayhaqiy rivoyati).
Sufyon ibn Uyayna rahmatullohi alayh: “Bu hadisni oltmish yil tajriba qildim va faqatgina yaxshilik ko‘rdim”, deganlar.
Ashuro kunini Rasululloh sollallohu alayhi vasallam qanday o‘tkazardilar?
Rasululloh sollallohu alayhi vasallam bu kunni o‘tkazib yubormaslik uchun qattiq harakat qilardilar, uning savobiga erishish uchun bu kunning kelishini intiqlik bilan kutardilar. Bu haqda Ibn Abbos roziyallohu anhu aytadilar: “Rasululloh sollallohu alayhi vasallamni Ashuro kuni ro‘zasini Ramazon oyi ro‘zasini kutib sog‘ingandek, boshqa kun va oy ro‘zasini kutganlarini ko‘rmadim” (Imom Buxoriy, Imom Muslim rivoyati).
Abdulloh ibn Abbos roziyallohu anhudan rivoyat qilinadi. Rasululloh sollallohu alayhi vasallam Ashuro kuni ro‘zasini tutib, odamlarni ham bu kunning ro‘zasini tutishga buyurganlarida, sahobalar: “Yo, Rasululloh! Bu kun yahudiy va nasroniylar ulug‘laydigan kun-ku!” deyishdi. Shunda Rasululloh sollallohu alayhi vasallam: “Alloh xohlasa kelasi yil to‘qqizinchi kuni ham tutamiz”, dedilar. Ammo, kelasi yil kelmasidan Rasululloh sollallohu alayhi vasallam vafot etdilar (Imom Muslim rivoyati).
Ulamolarimiz Rasululloh sollallohu alayhi vasallamning ushbu niyatlariga e’tiboran, Ashuro kuniga qo‘shib bir kun oldingi yoki bir kun keyingi kunda ham ro‘za tutmoq afzal deydilar.
Alloh taolo ushbu oyning fazilatlaridan barcha mo‘min-musulmonlarni to‘liq bahramand etsin. O‘zining roziligini topadigan amallarda bardavom qilsin.
O‘zbekiston musulmonlari idorasi
Matbuot xizmati
