Ziyorat turizmini mamlakatimizda yanada rivojlantirish maqsadida ko‘plab islohotlar amalga oshirilmoqda. Shunday islohotlardan biri sifatida Toshkent xalqaro aeroportida namozxona tashkil etilganini keltirib o‘tish o‘rinlidir.

Sohani rivojlantirish, yurtimizga tashrif buyurayotgan ziyoratchilarga qulaylik yaratish maqsadida O‘zbekiston Respublikasi Turizmni rivojlantirish davlat qo‘mitasining “Turistik xizmatlarni sertifikatlashtirish markazi” davlat unitar korxonasi tomonidan yangi davlat standarti ishlab chiqildi.

O‘z DSt 3220:2017 “Turistik xizmatlar. Joylashtirish vositalari. Umumiy talablar” bo‘yicha standart 2018 yilning 1 yanvaridan kuchga kirishi belgilangan.

O‘rnatilgan qoidalarga ko‘ra, har bir mehmonxonaning umumiy xonalar sonining kamida o‘ndan birida Qur’oni karim, ibodat qilish uchun joynamoz hamda kamida 30 foizida qibla ko‘rsatgichi bo‘lishi shart.