Jannat hidi ham nasib etmaydi
Baraka – jamoatdadir. Ya’ni hamjihat bo‘lib, birlashib, o‘zaro ahillik bilan yashashda baraka, fayz bo‘ladi. Donolarimiz: “Bir marta janjal bo‘lgan xonadondan qirq kunlik baraka qochadi”, deydilar. Darhaqiqat, janjal bo‘lgan xonadondan baraka, fayz ketadi.
Mana shu janjalni kelib chiqishiga eng katta vositalardan biri, insonlarning bir-birlariga nisbatan bo‘lgan ishonchi, ahillikni yo‘qolishining sabablari nimada? Buning eng katta sabablaridan biri – firibgarlik illatining jamiyat orasida ko‘payib borayotganidir. Mana shu illatning sababidan insonlar bir-biriga ishonmay qo‘yadi. Jamiyatda birdamlikning buzilishiga, o‘zaro hamjihatlik va ishonch singari tuyg‘ularning kamayib ketishiga sabab bo‘ladi.
Islom dini mana shunday illatlarga berilgan kimsalarni va ularning ishini qattiq qoralaydi. Rasululloh (sollallohu alayhi va sallam): “Firibgar va yomon xususiyatli kimsa jannatga kira olmaydi”, deganlar (Imom Termiziy rivoyati).
Inson hayoti mobaynida jannatga kirishga, Allohni diydorini ko‘rishga sabab bo‘ladigan xayrli amallar qilishga intiladi. Rasululloh (sollallohu alayhi va sallam)ning shafoatidan umidvor bo‘ladi. Ammo firibgarlik singari yomon xulqni o‘zida aks ettirgan, tabiatiga aylantirib yuborgan kimsalar yuqorida aytilgan eng ulug‘ baxtlardan mosuvo qoladilar.
Mo‘min kimsa firibgar bo‘lmaydi. Qalbida imoni bo‘lgan kimsalar o‘zgalarni aldamaydi, turli fitna-fasodlarni chiqarmaydi. Birovni haqqini turli xil xurofot, makkorliklar-u, firiblar bilan o‘zlashtirmaydi.
Zotan mo‘min kishi o‘ziga ravo ko‘rganni o‘zgaga ham ravo ko‘rishi, ravo ko‘rmaganini esa, o‘zgaga ham ravo ko‘rmaydigan bo‘ladi. Mana shundagina komil musulmon bo‘ladi. Demak, o‘zimizga jannatni, Allohning diydori, Rasululloh (sollallohu alayhi va sallam)ning shafoatlarini xohlaymizmi demakki, do‘stlarimiz, farzandlarimiz, aka-uka, yor-birodarlarimiz, barcha yaqinlarimizga ham shuni istamog‘imiz lozim bo‘ladi.
Bir yaqinimizni vafot etishi yoki biror bir do‘stimizni yo‘qotishimiz haqiqiy ayriliq emas. Bu dunyo foniy dunyo, Yaratgandan o‘zga barchaning tark etishi muqarrar. Ammo o‘zingiz jannatga kirsangiz-u yaqiningizni topa olmasangiz, O‘zi asrasin do‘zaxda bo‘ladigan bo‘lsa, mana bu haqiqiy ayriliqdir.
Abdutolib ISAQOV
Farg‘ona viloyati Oltiariq tumani
“Oq masjid” jome masjidi imom-xatibi
Matbuot – jamiyat ko‘zgusi
Ommaviy axborot vositasi – jamiyat ko‘zgusi, millatning yuzi. Uning zimmasida keng jamoatchilikni fikrlashga chorlash, tarbiyalash, dunyoqarashni boyitishdek mas’uliyat turadi.
Keyingi yillarda mamlakatimizda huquqiy demokratik davlat va fuqarolik jamiyati barpo etishning muhim sharti bo‘lgan ommaviy axborot vositalarini rivojlantirish, ularning moddiy-texnik bazasi va kadrlar salohiyatini mustahkamlash, so‘z va matbuot erkinligini ta’minlash, soha vakillarini har jihatdan qo‘llab-quvvatlashga bo‘yicha keng ko‘lamli ishlar amalga oshirilmoqda.
Shu munosabat bilan bugun O‘zbekiston xalqaro islomshunoslik akademiyasida "Matbuot – jamiyat ko‘zgusi" mavzusida davra suhbati bo‘lib o‘tdi.
Mazkur tadbir 27 iyun – Matbuot va ommaviy axborot vositalari xodimlari kuni munosabati bilan tashkil etildi. Unda O‘zbekiston xalqaro islomshunoslik akademiyasi rektori Muzaffar Komilov, OAV vakillari, Akademiya o‘qituvchi va xodimlari ishtirok etdi.
So‘zga chiqqanlar so‘nggi yillarda yurtimizda so‘z erkinligiga bo‘lgan e’tibor yangi darajaga ko‘tarilganini qayd etishdi. OAV demokratik qadriyatlarni qaror toptirish, dunyoda va mamlakatimizda sodir bo‘layotgan ijtimoiy-siyosiy jarayonlar, voqea-hodisalar haqida tezkor va haqqoniy ma’lumotlar yetkazish, Yangi O‘zbekistonning demokratik qiyofasini shakllantirishda muhim rol o‘ynayotganini ta’kidlashdi.
Darhaqiqat, davlatimiz rahbari soha vakillarining mehnatini doimo e’tirof etar ekanlar, shunday fikrlarni bildirgan edilar:
"Biz bugun huquqiy demokratik davlat qurayotgan ekanmiz, jurnalistikaning butun dunyoda e’tirof etilgan, o‘zgarmas talab va mezonlariga amal qilishimiz zarur. Bu mezonlarning eng asosiysi – xolislik va haqqoniylikdir. Binobarin, matbuot maydoniga kirgan inson – u jurnalist bo‘ladimi, bloger bo‘ladimi, bundan qat’i nazar – ana shu qoidalarga amal qilishi shart".
Uchrashuv davomida "Yangi O‘zbekiston" va "Pravda Vostoka" gazetalari bosh muharriri Salim Doniyorov, "Jadid" gazetasi bosh muharriri Iqboljon Mirzaaliyev, Adliya vaziri maslahatchisi, bloger Shahnoza Soatova hamda "Ziyo" media markazi direktori Abduhamid Muxtorov so‘zga chiqib, o‘z fikr-mulohazalarini bildirdilar.
Shundan so‘ng yurtimizda diniy-ma’rifiy sohada amalga oshirilayotgan keng ko‘lamli islohotlar hamda yosh avlodning barkamol voyaga yetishi, xalqaro standartlar asosida ta’lim olishi, ilm-fan, kasb-hunar cho‘qqilarini egallashi hamda xalqimiz ma’naviy-ma’rifiy yuksalishi borasidagi yangilanishlarni keng jamoatchilikka samarali yetkazishda Akademiya bilan faol hamkorlik qilib kelgan bir guruh OAV xodimlarni bayram munosabati bilan taqdirlash marosimi o‘tkazildi.
Bir guruh jurnalistlarga tashakkurnoma va esdalik sovg‘alari topshirildi.
O‘zbekiston xalqaro islomshunoslik akademiyasi
Matbuot xizmati
