Huquqbuzarlik profilaktikasi va jinoyatchilikka qarshi kurash borasidagi vazifalar ijrosi hamda mavjud muammolarni hal etish masalalari yuzasidan O‘zbekiston Respublikasi Prezidenti o‘tkazgan videoselektor bo‘yicha O‘zbekiston musulmonlari idorasida ham diniy soha xodimlari ishtirokida Diniy idora raisi muftiy hazratlari boshchiliklarida majlis bo‘lib o‘tgani haqida 18 noyabr kuni xabar bergan edik.
Yig‘ilish yakunida O‘zbekiston musulmonlari idorasi raisi, muftiy Usmonxon Alimov hazratlari bugungi kunda jamiyatimizda kuzatilayotgan sun’iy urug‘lantirish masalasiga alohida to‘xtalib: «Diniy idoramizning Xotin-qizlar bilan ishlash bo‘limiga ushbu masala yuzasidan murojaatlar bo‘lmoqda va Fatvo bo‘limiga ham savollar kelib tushmoqda. Hatto ayrimlar yetti yot begona insonning urug‘idan homilador bo‘lib, qilgan ishi joiz emasligini bilgach, endi nima qilaman, deb bosh qotirmoqda. Xo‘sh, sun’iy urug‘lantirish borasida dinimiz ta’limotida nima deyiladi, qanday usuli joiz-u, qaysinisi harom? Mo‘min-musulmonlar ham bu usullardan foydalansa bo‘ladimi? Shu kabi savollarga batafsil javob beruvchi, ushbu masalalarga aniqlik kirituvchi barcha hukm va ko‘rsatmalarni o‘z ichiga olgan fatvo ishlab chiqish va xalqimizga yetkazish zarurligini” ta’kidladilar.
Shuningdek, muftiy hazratlari ayollar va yosh bolalarga zulm qilish kabi jamiyatimizda uchrab turgan nohush xolatlar og‘ir gunoh ekani, shuningdek, g‘arbdan kirib kelayotgan milliy va diniy qadriyatlarimizga mutlaqo to‘g‘ri kelmaydigan eng jirkanch illatlarga qarshi fatvolar e’lon qilish orqali kurashish muhimligini alohida qayd etib o‘tdilar.

O‘zbekiston musulmonlari idorasi
Matbuot xizmati