Otam menga mehribon edilar. Uyga kelsam, xuddi Payg'ambarimiz alayhissalom qizlari Fotima onamiz roziyallohu anhoni kutib olganlaridek kutib olishga harakat qilardilar. Huzurlariga kirganimda men bilan o'rnilaridan turib ko'rishardilar. Menga salom berib peshonamdan o'pib qo'yardilar.

Oisha onamiz roziyallohu anhodan rivoyat qilinadi: “Men Rasululloh sollallohu alayhi vasallamga Fotima qizlarichalik ko'p o'xshaydigan odamni ko'rmadim. Maqsadi jihatidan, hayotiy yo'l tutishi, har bir yurish-turishi, gap-so'zi, suhbatlashishida Fotima qizlaridanda o'xshashini ko'rmadim. Har qachon Fotima onamiz agar Rasulullohni huzurlariga keladigan bo'lsalar Rasululloh alayhissalom o'rnilaridan turib, qo'llaridan ushlar va o'pib qo'yib, o'zlari o'tirgan joyga o'tirg'izardilar. Qachonki Rasululloh sollallohu alayhi vasallam Fotima onamizning huzurlariga kiradigan bo'lsalar Fotima onamiz ham o'rnilaridan turib, Rasululloh alayhissalomni kutib olar edilar, qo'llaridan tutib Rasululloh sollallohu alayhi vasallamni o'pib, o'tirgan joylariga o'tirg'izib qo'yar edilar.

Rasululloh sollallohu alayhi vasallam qanday kutib oladigan bo'lsalar Fotima onamiz ham Rasulullohni shunday kutib olar edilar, shuning uchun ham Fotima onamizdanda Rasululloh sollallohu alayhi vasallamga o'xshashini ko'rmaganman”.